Secretario di Simar, Maroushka Cornelie “Mi no ta kere cu e brug a kibra” cu minister di Enseñansa

Ayera Simar a sinta cu Minister Presidente en bes di a reuni cu minister di Enseñansa pa atende un asunto cu ta concerni directamente na su cartera, esta e situacion di e managernan di EPI. Den e reunion aki secretario di Simar, Maroushka Cornelie a bay compaña pa varios miembronan di e grupo di managernan.

Cornelie a declara na Bon Dia Aruba cu Simar a manda ultimamente cinco carta pa minister Michelle Hooyboer-Winklaar pidiendo e mandatario pa sinta na mesa, y nada. El a splica cu nan kier a bin directamente cerca Minister Presidente directamente, pero sinembargo Simar a dicidi di manda un ultimo carta na e mandatario di Enseñansa,  pero lamentablemente e sindicato no a haya reaccion.  Den e carta ultimo cu nan a manda na minister Hooyboer-Winklaar, Simar a pidi un reunion prome cu 16 di maart, “pero nos no a haya niun reaccion”, asina secretario di Simar a laga sa.

Encuanto si e brug a kibra entre Simar y minister di Enseñansa, Cornelie a bisa cu “mi no ta kere cu e brug a kibra”. Sinembargo nan di Simar ta kere cu e brug tin algun piedra ariba dje y e tin algun clabo, pero “masha facil pa bo coy un basora y bari nan pa bo por pasa hunto riba e brug ey”.

En bista cu Simar no a haya niun reaccion fei e minister menciona, y te hasta nan a purba di haya intermediacion di Mediador di Gobierno pa logra sinta cu minister di Enseñansa, pero tampoco nan no a logra. “Nos a dicidi e ora di bin cerca e hefe mes pa puntra si e por yuda nos pa yega na mesa cu minister di Enseñansa”, segun Cornelie. Esaki apesar cu e minister mes di Enseñansa a bisa publicamente cu na mesa bo ta negosha, y “esey nos a purba di haci tambe…”, asina secretario di Simar a declara.

Na su salida ayera merdia di e reunion cu Simar a sostene cu Prome Minister sr. Mike Eman, Cornelie a declara cu e mandatario a ricibi nan “hopi positivo” Y no solamente positivo sino cu e prome mandatario a compronde tambe e situacion di e managernan di EPI.

E punto principal –segun Simar- ta cu si nos ta compara e responsabilidad di cu un manager di EPI tin y e cantidad di hende cu ta traha bou di dje y e cantidad di studiantenan cu nan tin cu guia, cu esun di e nivel di scol mas abou cu ta enseñansa primario, caminda bo tin un cabesante cu tin pa ehempel 3 of 5 hende cu ta traha cun’e y un cantidad di tres pa cinco klas cu ta alrededor di 100 pa 120 mucha, Simar ta haya “ridiculo” pa acepta cu e grupo di managernan di EPI no ta bin na remarca pa un compensacion.