Recientemente Secretario di Estado di Digitalisacion y Relacionnan den Reino, Zsolt Szabó, a manda un carta pa presidente di Tweede Kamera relaciona cu e debate di comision tocante desaroyo economico y autosuficienida di e parti Caribense den Reino cu lo tuma luga den luna di april. Den preparacion pa e debate aki, el a informa e parlamento tocante e esfuerso di gabinete riba e temanan aki.
E Secretario di Estado a indica cu e reto cu e seis islanan den Caribe Hulandes ta enfrenta den e area di desaroyo economico ta similar na esun di e Small Island Developing States (SIDS). E categoria di paisnan aki, reconoci pa e Nacionnan Uni, ta distingui pa limitacion structural, manera e tamaño chikito di e isla, capacidad institucional limita, dependencia di factor externo, economia fragil y habri, y gastonan halto pa conectivitad.
El a splica cu e gabinete ta reconoce cu e limitacion structural aki ta pidi un acercamento comun. P’esey, el a indica, e gabinete kier traha hunto cu e gobierno local, empresario y sector publico y priva riba e islanan pa desaroya solucionnan concreto. Esaki ta enfoca riba crecemento economico y, mediante esaki, e meta pa logra mas autosuficiencia.
El a sigui splica cu pa henter e parti Caribense di e Reino, e islanan mes tin e responsabilidad pa desaroyo economico. Pero pa Boneiro, Saba y Sint Eustatius, e Reino mes tin un rol pa stimula desaroyo economico y autosuficiencia. Pa e paisnan autonomo, Reino ta duna sosten solamente si ta necesario y si e dos partido ta di acuerdo. Den esaki, e Landspakket ta e instrumento principal.
El a agrega cu ademas, tin desafionan cu e seis islanan por soluciona miho a traves di acuerdo conhunto. El duna como un ehempel e tema di mehoracion di seguridad di alimento y promove e conectivitad den e region. E temanan aki ta fuertemente relaciona, pasobra e islanan ta depende di otro, y ta pidi un acercamento integral.
Pa loke ta e desaroyo economico di e paisnan Autonomo den Reino, Secretario di Estado Szabó a remarca cu e maneho di desaroyo economico ta un asunto autonomo di Aruba, Corsou y Sint Maarten mes. El a indica cu e gabinete ta duna sosten na e paisnan a traves di e acuerdonan cu a ser logra den e Landspakketten y, na Sint Maarten, tambe via e Trustfonds Wederopbouw Sint Maarten di Banco Mundial. Ademas, el a agrega, na Corsou tin un colaboracion pa desaroya un cadena di hidrogeno berde (groene waterstofketen), y via e Caribbean Regional Technical Assistance Centre (CARTAC) ta duna sosten na tur tres pais Caribense. Un maneho di finanzas publico sostenibel ta ser respalda door di Hulanda via e Rijksministerraad y e inscripcion actual den e Rijkswet financieel toezicht.
Secretario di Estado Szabó a señala cu similar na Boneiro, Saba y Sint Eustatius, bon gobernacion, un gobierno cu un situacion financiero stabiel, un vision a largo plaso riba economia, un nivel suficiente di inversion publico, un mercado di capital funcional y un bon colaboracion regional ta importante pa desaroyo economico y autosuficiencia. El a indica cu e condicionnan aki ta ser menciona regularmente door di e International Monetary Fund (IMF). Na mesun momento, el a menciona, e paisnan ta enfrenta limitacionnan tipico di isla chikito den desaroyo, manera capacidad limita di instituto publico, loke ta stroba crecemento economico y un uso efectivo di recurso.
Di banda di Hulanda, el a informa, ta traha hunto cu e paisnan autonomo den Reino riba e siguiente temanan economico:acceso na financiamento pa MKB; un clima faborabel pa negoshi y inversion; un mercado laboral cu ta funciona bon; digitalisacion y disponibilidad di data pa politica y ehecucion; inversionnan infrastructural na Sint Maarten (Trustfonds); conocemento institucional y resilencia; y innovacion (cadena di hidrogeno berde na Corsou).
Pa loke ta trata acceso na financiamento pa MKB, Secretario di Estado Szabó a splica cu e gabinete ta duna sosten na e economia di e paisnan door di pone disponibel e Borgstelling MKB-Kredieten pa Aruba, Corsou y Sint Maarten (BMKB ACS) despues di e zomer di 2025. E programa aki, el a sigui splica, cu ta existi caba pa Hulanda, Boneiro, Saba y Sint Eustatius, lo ser introduci pa e paisnan autonomo den Reino tambe, debi na e falta di posibilidad di financiamento pa negoshinan chikito y mediano (MKB). El a indica cu hopi negoshinan ta haya dificil pa inverti y crea crecemento, loke ta stroba diversificacion di economia. Cu e BMKB-regeling, MKB lo haya un miho acceso na capital. E criterio pa e programa aki a ser aproba door di e Rijksinisterraad riba 31 di januari.
El a indica cu den cuadro di e Landspakketnan, Aruba, Corsou y Sint Maarten ta trahando hunto pa simplifica e regulacionnan riba negoshi y inversion, manera digitalisa e procesonan di permiso. El a agrega cu tambe tin trabou riba reforma di sistema fiscal y modernisacion di servicio di impuestonan. Esaki ta yuda pa tene regulacion mas manehabel y pa mehora e clima di inversion y moral di impuestonan. El a remarca cu un gobierno cu ta recoge suficiente impuesto ta fundamental pa autosuficencia economico.
Secretario di Estado Szabó a menciona cu na Aruba, ta trahando riba e Agri Innovation Park, cu ta stimula produccion local di berdura y fruta cu tecnologia innovativo. Esaki ta contribui na un sector agricola sostenibel, ta reduci dependencia di importacion y ta duna sosten na empresarionan agricola cu tecnologia moderno.
Tocante e tema di mercado laboral, el a indica cu den cuadro di e Landspakketnan, ta traha riba diferente manera pa mehora e mercado laboral. El a splica cu door di modernisa e mercado laboral, por ehempel cu introduccion di regulacion nobo pa contratonan temporal ymiho condicionnan laboral door di gobierno, e proceso di permiso pa trahado externo lo bira mas lihe, y lo bira mas facil pa atrae migrantenan cu experiencia y conocemento. El a agrega cu Hulanda tambe ta traha cu e Ministerio di Enseñansa, Cultura y Ciencia pa mehora e sistema di educacion y e conexion entre educacion y e mercado laboral.
Pa reforsa desaroyo economico, Secretario di Estado Szabó a indica cu e paisnan ta trahando hunto pa mehora e coleccion di data y pa formula politica basa riba evidencia. Cu esaki, tin trabou pa reforsa e Sistema Nacional di Estadistica; mehora e base di dato original, intercambio di dato na un manera digital, seguro y eficaz, y actualisacion di e regulacionnan di estadistica pa publicacion di data esencial pa politica.
El a agrega cu ademas, e paisnan autonomo den Reino ta trahando hunto pa un maneho centralisa di e gobierno digital, cu ta inclui refuerso di e organisacionnan Chief Information Officer (CIO) y mehoracion di servicio digital na ciudadano- y negoshinan.
Por ultimo, el a remarca cu pa logra desaroyo sostenibel, e paisnan mester ta envolvi y duna importancia na conocemento institucional. El a subraya cu Hulanda ta duna sosten pa reforsa e capacidad institucional y resilencia den e paisnan.
Ademas, el a agrega, Hulanda ta duna sosten na iniciativa pa mehora colaboracion y intercambio di informacion entre Aruba, Corsou y Sint Maarten riba desaroyo economico sostenibel. Un conferencia di trabou cu a tuma luga na Sint Maarten na final di januari a sirbi como prueba di e colaboracion.
El a indica cu e Caribbean Regional Technical Assistance Centre (CARTAC) di IMF tambe ta contribui na e capacidad institucional y resilencia di Corsou, Aruba y Sint Maarten. CARTAC ta duna entre otro formacion den area di regulacion fiscal, stabilidad financiero y macro-economia. El a menciona cu un donacion reciente di Hulanda di 1.5 miyon euro, Hulanda ta sigui yuda e trabou di CARTAC. Tambe, e paisnan autonomo mes a contribui 0.75 miyon dollar cada uno.
