Recientemente Secretario di Estado Zsolt Szabó a manda un carta pa Tweede Kamer den cual e ta contesta algun pregunta cu parlamentario de Vries a manda pa su persona tocante corupcion y narcotrafico di politiconan na Aruba y Corsou.

Parlamentario de Vries a puntra e Secretario di Estado kico ta su opinion tocante e noticia cu un miembro di Parlamento na Corsou ta bay ser investiga pa actividadnan criminal, specificamente narcotrafico y labamento di placa.

El a subraya cu esaki a bin tambe despues cu ex minister Glenbert Croes a keda deteni pa posibel partisipacion den fraude relaciona cu permiso di estadia y trabou, y ekipo di cooperacion di investigacion a haci buskeda na oficina di minister di Husticia Lewis na Sint Maarten, cu tabata kier dos detenido keda den libertad bou di monitoreo electronico, incluyendo ex politico Heyliger, cu a keda condena pa corupcion y labamento di placa.

Secretario di Estado a splica den su contesta cu corupcion, subversion y otro forma di crimen no tin lugar den un estado di derecho, P’esey, e ta traha hunto cu paisnan Caribense den Reino di Hulanda pa logra bon gobernacion y fortalece estado di derecho.


 E parlamentario tambe a puntra kico e ta pensa tocante e noticia aki den relacion cu e acuerdo pa logra mehora den bon gobernacion na e islanan y kico ta su pensamento di e noticia den e contexto di meta cu ta acorda den e Landspakketten, y kico ta e consecuencianan cu parece cu no tin suficiente resultado.

Secretario di Estado Szabó a splica cu esfuersonan den e area aki den e Landspakket ta enfoca specialmente riba un funcionamento bon y eficiente di e sector publico. El a indica cu trabou ta bay dilanti cu un ritmo constante y ta spera cu e lo duna resultado na su momento. Transparencia di e proceso y distancia entre gobierno y e sector publico ta inclui den e atencion. El a resalta cu prevencion di asuntonan di integridad relaciona cu politiconan individual no ta den e limitenan di e Landspakket.

De Vries a puntra tambe kico e Secretario di Estado ta haci pa mehora bon gobernacion y pa ataca crimen di subversion di politico- y miembronan di parlamento na e islanan.

Secretario di Estado Szabó a splica den su contesta cu bon gobernacion y seguridad di derecho ta forma parti di su prioridadnan politico pa e parti Caribense di Reino. Den su carta na Parlamento di 18 di october 2024, el a indica cu e ta kere ta necesario pa monitorea e estado di integridad den e parti Caribense di Reino. Esaki, el a señala, lo duna visibilidad riba e integridad y e punto di mehoracion. El a remarca cu e ta den dialogo cu e islanan pa traha hunto pa logra compatibilidad cu indexnan y monitornan existente riba integridad y bon gobernacion.

El a sigui splica cu e aña aki e lo presenta su agenda di bon gobernacion pa e islanan y pa Boneiro, Sint Eustatius y Saba. Den esaki lo tin enfoke riba monitoreo, supervision y aplicacion tocante permisonan, sosten di denunciante y clarificacion di proceduranan pa compras y contratacion publico.

Ademas, e Secretario di Estado a indica, Parlamento Hulandes a aproba un proposicion di miembro Mutluer pa evalua cu Justitieel Vierlandenoverleg (JVO) kico por haci pa intensifica e lucha contra trafico di droga di e islanan pa Hulanda. Durante e ehecucion di e proposicion, lo busca involucracion di ministerionan di Husticia di e paisnan.

El a agrega cu tambe ministerio di Husticia y Seguridad a pone disponibel fondo te 2025 pa funda e Regional Information and Expertise Centre (RIEC CN) pa Caribe Hulandes. Ademas, ta procede cu un trayecto di leynan pa introduci Wet Bibob na Boneiro, Saba y Sint Eustatius.

Tambe, el a menciona, ministerio di Husticia y Seguridad a libera fondo pa Boneiro, Saba y Sint Eustatius pa por uni na e grupo di trabou JVO riba e manera di aborda crimen di subversion na nivel gubernamental, pa asina tur islanan por ta parti di e lucha.

Secretario di Estado Szabó a remarca cu esfuersonan cu a cuminsa contra crimen ta duna resultadonan. Pa loke ta integridad gubernamental, el a indica cu Hulanda y e paisnan ta traha hunto den e enfoke conoci manera e “bestuurlijke aanpak van ondermijning.” Desde 2021, ministerio di BZK ta libera 1 miyon euro anual pa e enfoke aki.

Den esaki, el a señala, ta desaroya y implementa instrumentnan pa preveni corupcion y subversion. Na mesun momento, ta trece mas resistencia pa politiconan contra influencia di corupcion. El a menciona cu recientemente e tres pais a lansa un campaña cu mester trece mas sosten publico contra corupcion gubernamental.

El a indica cu ademas ta contrata expertonan di leynan pa streamline proceduranan di permisonan. E metodo ta basa riba e enfoke exitoso contra subversion cu ta usa na comunidadnan di Hulanda, cu permiti cu ayudonan publico por tuma medidanan preventivo, manera rehusa of anula permisonan, of cera un lokal.

Den marco di e lucha sostenibel contra subversion na Aruba, Corsou y Sint Maarten, el a subraya ta inverti den Recherche Samenwerkingsteam (RST), Ministerionan Publico y e Hof di Husticia Comun. Esaki, el a indica, ta permiti investigacionnan criminal cu un componente financiero-economico fuerte, manera fraude fiscal, malversacion di fondo publico, falsificacion di documento y labamento di placa.

Parlamentario de Vries a puntra Secretario di Estado Szabó ki conclusion e ta saca di e eventonan reciente di e enfoke actual pa bon gobernacion y e lucha contra corupcion, politica di “friends and family” y crimennan di subversion y kico esaki ta bisa tocante e efisiencia di e manera actual te awor.

E Secretario di Estado a indica cu un estado di derecho cu ta funciona bon ta un rekisito fundamental pa un comunidad sigur y stabiel, un desaroyo economico positivo y finanzas publico sostenibel. El a remarca cu e sucesonan reciente ta indica cu ta necesario pa sigui traha riba su prioridadnan politico y pa monitorea e estado di integridad den e parti Caribense di Reino di forma structural. El a indica cu di otro banda, e desaroyonan ta mustra cu e manera di lucha contra subversion ta funcionando manera esnan cu e paisnan y Hulanda ta implementa hunto.

Por ultimo e parlamentario a puntra e Secretario di Estado si e ta di acuerdo cu tin mester di un manera mas estricto y fuerte pa trata corupcion, “friends and family” y crimen di subversion.

Secretario di Estado Szabó a splica cu e manera di trata crimen di subversion, “friends and family” y corupcion ta un asunto autonomo di e paisnan. Sinembargo, el a resalta, e lucha contra e forma di crimen aki ta esencialmente un rekisito di nivel di experticio y capacidad operacional cu ta limita na e paisnan.

El a remarca cu Hulanda ta sigui duna sosten na Aruba, Corsou y Sint Maarten den nan meta comun pa fortifica un estado di derecho fuerte. Mi ta den dialogo cu e paisnan pa tene un miho visibilidad riba e estado di integridad den Reino. Den e marco aki, el a indica cu e tambe ta den contacto cu Transparency International y otro organisacionnan.