Manera ta conoci recientemente Secretario di Estado pa Digitalisacion y Relacionnan di Reino, Zsolt Szabó, a bishita Aruba den su di dos bihsita di trabou oficial. Durante e bishita aki Secretario di Estado Szabó a cera conoci cu Gabinete AVP-FUTURO y ademas a asisti algun otro actividad.

E bishita di trabou a cuminsa diahuebs 8 di april caminda el topa, entre otro, cu e ministernan di gabinete nobo, Gabinete AVP-FUTURO, bou liderazgo di Mike Eman, cu a tuma poder recientemente. Apart di un dialogo cu e ekiponan di minister nobo, e Secretario di Estado a combersa tambe cu miembronan di Parlamento di Aruba.

E bishita di Szabó na Aruba ta tambe den marco di bon gobernacion y den contexto di esaki e Secretario di Estado a asisti un lezing di Mieke de Droog, directora di programa di Instituto Arubano pa Bon Gobernacion y Liderazgo, na Universidad di Aruba. Durante e evento aki Secretario di Estado Szabó a participa den un sesion interactivo di pregunta cu studiantenan.

Autonomia economico ta un di e puntonan principal di Szabó, hunto cu bon gobernacion y finanzas solido. Pa motibo di esaki, Szabó a haci tambe durante su bishita e apertura oficial di e filial nobo di e compania di instalacion tecnico Pro-Tec cu recientemente ser cumpra pa e firma Hulandesa Van Dorp, y ta specialisa den enfriamento di edificio usando awa di lama.

Esaki ta e di dos bishita di trabou oficial di Secretario di Estado Szabó. Primeramenta el a bishita e Centro di Gobernacion pa asina cera conoci cu e ministernan di Gabinete AVP-Futuro. E bishita a inicia cu un reunion entre Secretario di Estado Szabó y prome minister Mike Eman, hunto cu minister di Asuntonan di Reino,Gerlien Croes, sigui cu un presentacion formal di henter e gabinete.

Mediante un comunicado di prensa Gobierno di Aruba a informa cu durante e reunion a trata e futuro di e relacionnan den Reino for di e perspectiva di e gobierno nobo, discuti topiconan importante pa Szabó y cu ta den liñacu e vision di Gabinete AVP-Futuro. “A reconoce un fundeshi solido pa reforsa e lasonan den Reino riba un base di respet mutuo y beneficio comparti, un “win-win situation” pa Aruba y Reino,” e comunicado a indica.

Segun gobierno ta inidca, Hulanda ta mira den direccion di Aruba pa sondea e areanan di cooperacion banda di locual tin caba na palabracion den e Landspakket y Rijkswet cu lo bin. Gabinete AVP-Futuro ta para pa un vision amplio di desaroyo, cu ta pone enfasis riba un crecemento socio-economico sostenibel, den cual Hulanda por sigui tin un rol prominente.

Segun e comunicad, pa Secretario di Estado Szabó, e concepto di autosuficiencia ta crucial: “un Aruba cu ta para riba su mesun pia den un cooperacion igual cu Reino Hulandes, basa riba fortalesa socio-economico.”

Como parti di e tema di autosuficiencia, prome minister Eman a invita Secretario di Estado Szabó pa un bishita na Museo Arkeologico Nacional Aruba (MANA), caminda a presenta un aspecto profundo di e identidad Arubano. Arkeologo drs. Raymundo Dijkhoff a guia e presentacion y a pone enfasis riba e historia di un pueblo cu a sobrevivi y progresa riba su mesun forsa, desde tempo precolonial te cu presente.

“A pone enfasis riba e mentalidad di esfuerso, unidad y amor cu a pone nos antepasadonan indjan, cosecha riba tera seco y pisca riba lama bruto. Esaki ta e mentalidad cu ta biba den e pueblo Arubano pa hopi generacion. E amor pa nos baranca y orguyo ta parti integral di e alma nacional. Esaki hustamente tabata e mensahe poderoso cu Sr. Szabó a haya durante su bishita.

Gabinete AVP-Futuro ta considera e bishita manera un paso positivo den direccion di renobacion, respety cooperacion entre Aruba y Hulanda,” gobierno a remarca.

Segun e comunicado di prensa ta informa Secretario di Estado Szabó su mes tin un yiu arkeologo y un interes particular den historia. Durante e bishita aki el a expresa su admiracion pa e rikesa cultural y resistencia di e pueblo Arubano, y alabes a indica cu ta importante pa conoce e historia di un pais, pa fortifica e identidad y pa inspira e generacionnan nobo den desaroyo di un Aruba fuerte y independiente den cooperacion cu reino.

Prome cu e bishita na MANA. Secretario di Estado Szabó a cera conoci cu Conseho di Minister, den cual cada minister a presenta e ambicion y prioridadnan di nan cartera. Segun Secretario di Estado Szabó, e reunion tabata positivo, informativo y a expresa su aprecio pa e energia y vision cu e gabinete ta proyecta.

“Tin un bon dinamica di cooperacion den Reino. E desafio awo ta pa sigui reforsa esaki den e periodo cu ta bin,” Szabó a conclui. Gobierno di Aruba ta considera e bishita como un paso constructivo den mehora e lasonan den Reino, basa riba comprension, respet mutuo y un vision comparti pa progreso sostenibel.