Despues di su bishita cortico na Aruba, Secertario di Estado nobo pa Relacionnan di Reino, Zsolt Zsabo a duna un entrevista cortico na portal online NoticiaCla. A pesar cu como condicion pa e entrevista a pidi NoticiaCla pa no puntra den detaye tocante asuntonan relaciona cu Aruba – por asumi ta nifica Landspakket, negociacion pa Rijkswet pa Supervision Financiero, y financiamento di debe cu Hulanda – e Secretario di Estado toch a duna su impresion y expectativa pa e relacion cu Aruba.

Zsabo a indica cu a pesar cu su bishita tabata cortico, a inform’e completamente di e topiconan importante door di ambtenaarnan na Hulanda, y durante su bishita el a ricibi e resto di e informacion necesario. El a indica cu despues di e bishita di conocemento aki, e lo defini su maneho pa Relacionnan di Reino pa e proximo 4 aña.

Manera medionan di comunicacion na Hulanda ya a menciona tempo cu a nombra Zsabo como Secretario di Estado pa Digitalisacion y Relacionnan di Reino, e punto fuerte di Zsabo ta den digitalisacion. Contestando si esaki ta un “min punt” pa e islanan, e Secretario di Estado a bisa cu por mir’e di otro banda, esta, cu e tin un fresco riba un dossier nobo. El a bisa cu e situacion a pon’e corda tempo cu el a bira parlamentario den Tweede Kamer, cu e tambe tabat’ey pa digitalisacion, y a bira vocero di Defensa, pa cual e tambe tabatin algun afinidad. Pero e ora a pidie pa bira vocero tambe pa Cooperacion pa Desaroyo (ontwikkelingssamenwerking), y cu e no tabatin ningun experiencia den e ramo aki, pero si e tabatin un vision riba Cooperacion pa Desaroyo. A pesar cu hopi hende a duda di su capacidad, ora e ta mira atras loke a logra den cuatro aña cu un bista fresco di pafo den e dossier, e ta mira un bon resultado.

Tocante e relacion y influencia di su partido, PVV den e dossier di Relacionnan di Reino, Szabo a bisa cu e gabinete actual na Hulanda ta uno extra-parlamentario, dus el a ser nomina pa e posicion como Zsolt Zsabo, maske si ta PVV cu a nomin’e. Pero a nomin’e na momento cu ya e acuerdo den “hoofdlijnen” tabata defini caba, y den esaki, un frase a resalta p’e, “ta considera e islanan valioso.” Zsabo a bisa cu esaki ta e punto di salida p’e pa su trabao den e cartera.

Ademas, a puntra Zsabo tocante e relacion dificil entre PVV y e islanan di Caribe, en gran parti pa motibo di comentarionan fuerte cu e partido a haci den pasado contra e islanan. Zsabo a bisa cu un pregunta asina lo ta miho dirigi pa vocero di PVV. Pa su propio punto di salida, por referi na e hoofdlijnenakkoord.

Tocante e relacion cu Aruba, Zsabo a bisa cu loke el a nota ta cu ta traha hunto den hopi diferente cos den diferente area, cu ta involucra diferente ministerio na Hulanda. El a bisa cu un relacion valioso por keda reforsa door di un miho enfoke, pasobra na final di dia, su meta ta pa Aruba y Hulanda, ora e caba su trabao, tin e sentimento cu a logra mas cu loke a yega di logra den pasado. El a menciona cu su enfoke ta riba bon maneho y politica financiero, cual e ta considera dos condicion, y e di tres ta autosuficiencia – den e sentido di desaroyo economico, pasobra e hecho cu alrededor di 80% di Aruba ta depende di turismo ta haci nos isla vulnerable. El a menciona cu tin diferente industria cu por desaroya y tambe por avansa den digitalisacion, por ehemplo Call Centernan. El a destaca cu e kier crea oportunidadnan hunto.

Contestando tocante su tolerancia pa cu Aruba, Zsabo a bisa cu e ta considera su mes personable, dus e ta hopi tolerante. Pero na mes momento, e ta orienta riba resultado, y cu e kier pa ora cu yega na acuerdo, cu ambos banda ta cumpli cu esakinan. “Mi tin suficiente pasenshi, pero tambe mi kier resultado,” el a expresa. El a bisa cu e kier mira bon ehecucion y implementacion, e kier pa consolidacion di e acuerdo y ideanan cu ta trece dilanti.

NoticiaCla a pidi e Secretario di Estado ademas pa clarifica un comentario cu prome minister di Aruba, Evelyn Wever-Croes a atribui na su persona, esta cu e tabata impresiona cu e futuro cu e premier ta mira pa Aruba. E pregunta tabata kico precies a impresiona e Secretario di Estado. Zsabo a bisa cu e calidad di e personanan, cu e reunionnan tabata extremadamente bon prepara, cu el a hay’e hopi profesional. El a bisa cu el a observa un enfoke riba futuro, pasobra el a menciona e dependencia riba turismo y ya tabata considerando diferente opcion; ademas ta enfocando riba desaroyo economico, tambe door di educacion na un nivel mas halto. Dus ta hopi orienta riba futuro y kier ta menos dependiente riba un of dos industria cu ta basa riba un nivel mas abao di educacion; es decir, nan kier involucra mas nivel di HBO, por ehemplo, cual por resulta den oportunidadnan manera e Call Center cu el a menciona, medicina, of arkitectura, pero pa esey mester hende cu ta bon educa.

Pa finalisa, e Secretario di Estado a bisa cu el a haya cu Aruba ta bunita, cu hende hopi agradable, di calidad y nivel halto.