Sin reforma no tin recuperacion economico. Asina Prome Minister Evelyn Wever Croes a bisa den presencia di Secretario di Estado Alexandra van Huffelen kende ayera a biaha pa St. Maarten despues di dos dia ta conoce Aruba. El a expresa tambe di ta contento cu Alexandra van Huffelen no a perde tempo pa bin bishita Aruba “cu ta ilustra un Secretario di Estado cu tin curazon pa nos paisnan. Mi ta spera riba un bon cooperacion.”

Di su banda, van Huffelen a bisa di ta contento pa a bishita Aruba, “pasobra pa wak otro den wowo y combersa den persona ta algo hopi bon.” El a splica di su recorido y reunionnan, entre otro cu Conseho di Minister, Parlamento, sindicatonan, pero tambe su bishita na Casa Cuna y e encuentro cu activista mr. Anouk Balentina. “Mi a mira arte espectacular na San Nicolas y mi a papia hopi riba e proteccion di naturalesa. Pero tambe a papia cu empresarionan.”

Segun van Huffelen, su obhetivo tabata specificamente pa por a scucha. Kico ta e necesidadnan, e soñonan, e preocupacionnan. “Tin hopi cos pa haci. Riba e substancia di bida, enseñansa, mercado laboral, naturalesa y clima.”

Van Huffelen ta bisa cu Hulanda ta para pa sostene Aruba pasobra ta consciente cu e pandemia a dal e parti Caribense di Reino den un forma sin igual. “Nos lo keda haci esaki unda cu ta necesario. Pero prome cu e momento ey tambe tabatin problema. Laga nos ta honesto.”

Aki van Huffelen a referi specificamente riba e debe halto y e productividad abao di aparato publico. “Y e coronavirus a haci e problemanan aki mas grandi. Y pa soluciona nan, no por conta unicamente riba recuperacion di turismo. P’esey ta importante pa traha na e reformanan.”

Van Huffelen a bisa cu e no ta un persona cu ta priminti cos cu e no por cumpli cune. Pero, e ta motiva pa hunto cu Aruba y su hendenan pa hunto traha na un bon futuro, basa riba igualdad y como parti di Reino. Mi a tende e soño y mi kier yuda realisa esakinan. Pa mi e ta conta, geen woorden met daden.

Palabracion cu Hulanda ta keda e liña cora, incluso 60 di AZV

Di otro banda, van Huffelen no a duna ningun señal cu e lo sostene cambio di direccion di locual a palabra caba riba condicionnan. E retonan di Aruba ta grandi y e pakete di reforma ta dirigi pa haci Aruba resiliente y e ta inclui e recorte den locual ta paga na cuido. “Mester haci trabao riba diferente frente. Pero e ta importante pa traha hunto, pa asina despues por inverti den otro area cu tambe ta importante, incluso salud, medio ambiente y labor.

Sinembargo, ainda no a logra cumpli cu e condicion di reduccion di 60 miyon den cuido. Riba e pregunta si Hulanda ta dispuesto pa renegocia e recorte aki, e contesta tabata similar cu locual Hulanda semper a bisa. Esta, cu a yega na un palabracion riba recortenan. E palabracionnan ta conta pa Hulanda y pa Aruba. “E ta importante pa keda combersa cu otro riba kico ta logra of no. E tema di cuido y e costonan ta un tema internacional. Pero esey no ta nifica cu no por mira con pa traha mas eficiente pa percura cu e gastonan ta keda bao control pasobra na final ta e comunidad mester carga cu e gastonan.”

Esey ta motibo tambe pakico van Huffelen a reuni tambe cu dokternan di cas y cu e directornan di e institutonan medico pa mira con pa realisa e reduccion. “E gastonan di cuido ta pisa enormemente riba presupuesto di Pais Aruba. Na Hulanda tambe e ta pisa, pues e ta bon pa mira con por haci’e mas eficiente sin perde bista riba e calidad di cuido.

Prome Minister a haci uso di e oportunidad pa publicamente gradici Gobierno di Hulanda pa e sosten di emergencia cu a ricibi. No solamente e sosten financiero, pero tambe e asistencia tecnico den e lucha contra COVID-19. El a enfatisa cu prome cu COVID-19 ya caba Aruba tabata manehando diferente crisis, for di e situacion financiero, e crisis social te e crisis cu Venezuela y a cuminza soluciona nan, te ora cu e pandemia a dal, cu a dal e crecemento economico para. Cu Aruba por a continua den e pandemia ta danki na esfuerso di tur Arubiano y e sosten di emergencia di Hulanda.

COHO

Mientrastanto e rijkswet COHO ta cla, cu ta duna e entidad su base legal. COHO, e organo Caribense pa Reforma y Desaroyo lo tin un duracion di seis aña, durante cual lo asisti Aruba den implementa e landspakket. Tin un posibilidad pa extension di dos aña. Segun Prome Minister, inicialmente el a haya e proposicion di tempo mucho largo, pero awor ta realisa cu e ta relativo. E pandemia mes ta bayendo pa dos aña caba. “Nos ta satisfecho cu e ayudo cu nos a ricibi. Nos a bay de acuerdo cu e texto di e ley y nos a bay de acuerdo cu e condicionnan. E condicionnan ta den liña cu nos mesun Masterplan cu tabata prome cu e landspakket. Pues no ta palabracionnan cu bay liña recta contra locual nos mes a pone como obhetivo pa sali di e crisis.”

Segun Alexandra van Huffelen, e ta importante pa keda cu e obhetivo na bista y e medio ta e sosten y condicionnan. E meta ta un Aruba mas fuerte, unda tin bon educacion, unda tin trabao y un bon medio ambiente y un economia floreciente, cu un autonomia fuerte. “Mi kier contribui na logra esaki.”

Mester bisa cu Alexandra van Huffelen a habri su presentacion cu frasenan na Papiamento y a priminti di lo haci su esfuerso pa siña mas Papiamento, ya cu su speransa ta pa pronto bolbe nos pais.