Recientemente den un carta data 11 di april 2024 Secretario di Estado pa Relacionnan di Reino, Alexandra van Huffelen, hunto cu Secretario di Estado di Salubridad, Bienestar y Deporte y Secretario di Estado di Husticia y Seguridad, a contesta algun pregunta cu miembro di Tweede Kamer, Koekkoek, a dirigi por escrito na su persona, dia 12 di februari 2024, ariba cuido (y entrada) pa personanan indocumenta na Aruba, Sint Maarten y Corsou.
Den su prome pregunta Koekkoek ta indica cu den respuesta na e carta di progreso di luna di october pasa relaciona na e mocion aproba, den cual ta pidi pa bin na dialogo cu ONG pa investiga con e gobierno Hulandes por brinda asistencia tecnico, experiencia y experticio adapta na e situacion na luga, pa yuda e otro paisnan autonomo den nan esfuersonan pa trata e problemanan di refugiadonan na Aruba, Corsou y Sint Maarten.
El a puntra si Secretario di Estado van Huffelen por splica cual organisacionnan local estableci na Aruba, Corsou of Sint Maarten a ser contacta y riba cual nivel, den marco di e mocion relaciona na e pregunta.
Secretario di Estado van Huffelen a contesta cu dentro di e cadena di e mocion, na december y januari ultimo a tene combersacionnan riba ambtelijk niveau entre ministerionan di Salubridad, Bienestar y Deporte (VWS) y Asuntunan Interno (BZK), incluyendo e Organisacion Temporal di Labor (TWO), e organisacion Corsou Sala pa Tur y Fundacion Refugiado.
El a indica cu e combersacionnan aki a enfoca riba e retonan cu personanan indocumenta ta enfrenta na Corsou, manera e accesibilidad na cuido di salud secundario, specialista y cuido di salud mental pa e pashentnan indocumenta. El a menciona tambe, relaciona na e retonan actual di migracion y personanan indocumenta, cu nan a tene un combersacion na nivel di direccion for di ministerio di Asuntunan Interno (BZK) cu e directiva saliente di Human Rights Defense Corsou (HRDC).
Van Huffelen a agrega cu Secretario di Estado di Husticia y Seguridad a realisa un bishita di trabou na islanan di Aruba, Corsou y Boneiro dia 14, 15, y 16 di maart. Meta di e bishita tabata pa mantene conocemento interno di e situacion actual y e problemanan di migracion riba e islanan.
Durante su bishita na Aruba e tabatin combersacionnan tocante e posibilidadnan pa promove cooperacion entre autoridadnan di frontera. Tambe e tabatin combersacion tocante posibel optimalisacion den e cadena di stranheria y a papia tocante politica di migracion y control di frontera.
Pa loke ta Corsou, el a indica cu tabatin combersacionnan cu organisacionnan local di NGO tocante migracion y implementacion di politica di migracion. Den e combersacionnan aki, a trata e puntonan di atencion di e comunidad social y nan colaboracion cu e gobierno local.
Den e contexto di esaki, el a menciona cu nan a tuma pasonan necesario pa mehora implementacion di politica di migracion y situacion di migrante. Ademas, e NGO-nan a enfatisa e importancia di sosten financiero duradero pasobra nan tambe depende di recoleccion di fondo.
Secretario di Estado van Huffelen a resalta cu en general, tin bon colaboracion cu e gobiernonan, pero ainda por tuma pasonan adicional pa reforsa y optimalisa e politica, incluyendo e maneho di traficacion di hende y implementacion di politica di migracion y control di frontera. El a agrega cu e Secretario di Husticia y Seguridad, hunto cu su persona, lo continua cu e dialogo gubernamental cu Amnesty International Hulanda y Vluchtelingenwerk Hulanda na april di 2024.
Miembro di Tweede Kamer Koekkoek a puntra tambe si por splica con y den ki contexto di e mocion a haci esfuerso riba cuido di salud y proteccion di menor di edad indocumenta (solitario of den un famia) door di e adaptacion di asistencia tecnico, experiencia y experticio di manera personalisa segun e necesidad.
Secretario di Estado van Huffelen a expresa cu e ta reconoce e retonan cu e paisnan den Caribe di Reino ta enfrenta relaciona na derechonan humano y migracion. Sinembargo, el a agrega, cu e ta cla cu e politica di migracion, incluyendo e accesibilidad na cuido di salud y proteccion di menor di edad indocumenta, ta un asunto di teritorio, y e paisnan den Reino di Hulanda ta primordialmente responsabel pa esaki.
El a señala cu manera el indica den su carta pa Tweede Kamer, actualmente tin combersacionnan den e grupo di trabou pa Regulacion Mutuo di Cadena di Stranheria (ORVK) tocante futuro colaboracion riba diferente topico di politica.
Van Huffelen a indica cu for di e raportahe periodico di puntonan principal di JVO na Tweede Kamer, e ta menciona cu entre otro, ta papia tocante continuacion di colaboracion riba e tereno di deportacion y un piloto di intercambio di informacion entre autoridadnan di control di frontera di e paisnan.
El a resalta cu futuro colaboracionnan y posibel ayudo lo ta basa riba e progreso cu a wordo logra den cadena di ORVK y den respuesta na yudansa entrega for di 2019 den e cuadro di e plan di inversion pa optimalisacion di e cadena di stranheria na Aruba y Corsou. El a agrega cu segun necesidad y deseo, lo wak ki tipo di yudansa Hulanda por brinda na e paisnan. Den e prome mita di 2024, e Secretario di Husticia y Seguridad a informa Tweede Kamer tocante e progreso di e actividadnan aki y posibel peticionnan nobo di ayudo for di e paisnan.
Koekkoek a puntra den ki medida di un forma structural di aporte di e organisacionnan (local) por wordo organisa pa e ‘Conferencia di Cuido di Cuater Pais’ (Vierlandenoverleg Welzijn) y si por duna un indicacion si tin atencion dedica den e agenda di ehecucion na e preocupacionnan di organisacionnan local tocante accesibilidad y disponibilidad di medicamento pa HIV y otro infeccionnan na Aruba, Corsou y Sint Maarten den e contexto di cuido.
Secretario di Estado van Huffelen a splica cu e gabinete ta reconoce e retonan cu personanan indocumenta ta encontra na e paisnan aki. El a remarca cu nan ta haci loke ta posibel den e relacionnan estatuario di Reino, caminda e paisnan autonomo tin e poder y responsabilidad pa maneho di personanan indocumenta den nan teritorio.
El a indica cu como resultado di e grupo di trabou, por ehemplo, a crea un resumen di intervencionnan preventivo cu ta wordo ehecuta na Aruba, Corsou y e islanan BES, manera programanan orienta ariba estilo di bida y sobrepeso. Basa riba esaki e islanan por comparti experiencianan y intercambia practicanan efectivo den futuro.
Pa loke ta e punto di salud sexual, el a remarca cu esaki ta un area di atencion specifico den e grupo di trabou di ‘prevencion’. Van Huffelen a indica cu e islanan a cera un acuerdo pa e aña binidero, intercambia conocemento y experiencianan riba e tereno aki y wak si ta necesario pa tin cooperacion ariba algun topico. El a menciona cu si e paisnan pidi esaki, e Secretario di Estado di BZK ta dispuesto pa pensa hunto cu nan riba preparacion y realisacion di e puntonan di agenda aki.
