E siman aki, Secretario di Estado pa Relacionnan di Reino, Alexandra van Huffelen ta bishita Aruba, ademas di Corsou y Sint Maarten. Segun un publicacion riba website di gobierno Hulandes, e bishita ta consisti pa gran parti di e firma di e Acuerdo Mutuo di Colaboracion den Reforma (Onderlinge Regeling Samenwerking bij Hervormingen).

Den e marco aki, e Secretario di Estado ta bay tene combersacion cu premier y ministernan tocante e colaboracion, ehecucion y progreso di e Landspakket. E bishita di e Secretario di Estado a cuminsa ayera cu su yegada na Aruba, unda e tabatin un combersacion planea cu premier Evelyn Wever-Croes tocante e Acuerdo Mutuo di Colaboracion den Reforma y e fondonan di inversion. Tambe riba agenda tin un combersacion cu minister di Finanzas, Xiomara Maduro, tocante impuesto.

Kico e Secretario di Estado ta negociando cu Prome Minister di Aruba?
 Loke tin riba mesa pa basta tempo ta e Ley di Reino pa Supervision Financiero pa Aruba, RAft. E ley aki ta duna Hulanda r mesun autoridad pa supervisa finanzas – esta entrada y gasto – di gobierno di Aruba, cu actualmente ta hinca den e ley di supervision di Aruba (LAft), aproba na december 2023. Mal maneho financiero na Aruba ta un problema cu ta bay back decadas cu consecuencianan devastador. Tempo di pandemia, ora Aruba a haya su mes sin reserva di placa pa por implementa programanan di ayudo pa nos poblacion ni tampoco cubri gobierno su propio gastonan, Hulanda a ofrece Aruba un prestamo hopi faborable – ademas di ayudo humanitario. E condicionnan faborable di e prestamo tabatin condicionnan mara na nan, entre otro e introduccion di e RAft. E RAft ta inclui normanan presupuestario, es decir, reglanan riba presupuesto di Aruba, cu tin como meta pa regula gasto innecesario, baha debe di Aruba, y reforsa e sostenibilidad di finanzas di nos pais. Hulanda ta exigi esaki como un garantia cu Aruba ta responsable cu su finanzas y cu lo por paga back e prestamo na Hulanda. Pa Hulanda, e hecho cu no tin un RAft ta un factor di riesgo, di manera cu nan ta cobra un interes mas halto riba e prestamo pa minimisa e riesgo aki. E riesgo ta cu segun Hulanda, e ley di Aruba por ser cambia pa Parlamento di Aruba, sin cu Hulanda ta ser consulta previamente.

A pesar cu a acepta e condicionnan di e prestamo cu interes abao durante pandemia, despues cu e crisis a pasa y Aruba a cuminsa recupera financieramente, Aruba a bolter y a dicidi pa no cumpli cu e acuerdo pa introduci e RAft. Gabinete Wever-Croes y Parlamento, di mayoria MEP, ta di opinion cu e RAft ta mina autonomia di Parlamento, ya cu ta e organo aki tin e tarea di supervision financiero. Esaki no ta corecto pasobra den e ley local (LAft) tambe ta Gobierno di Reino ta e organo supervisor,unda e colegio di supervision CAft ta duna conseho na Gobierno di Reino. Esaki ta asina desde 2015 tempo a aproba e ley LAft, ya cu esaki tabatin e mesun contenido pa e supervision cu e ley di supervision pa Corsou y Sint Maarten. Na su turno awor e ley RAft proponi pa Hulanda lo tin e mesun contenido cu e ley LAft di Aruba, y ta inclui e mesun norma presupuestario y otro condicionnan.

E diferencia entre un ley di Reino y un ley local ta cu Aruba por cambia su leynan na cualkier momento cu dicidi – algo cu a yega di sucede caba cu e ley local di supervision financiero na 2019. Esaki ta pone, segun palabranan di e Secretario di Estado, cu Hulanda no por confia cu Aruba ta bay tene su mes na e palabracionnan poni den e LAft. Y si nos tene cuenta cu e hecho cu Aruba ya caba a kibra e acuerdo haci den pandemia relaciona cu supervision financiero, e posicion di Hulanda riba esaki ta comprendible.

Igualmente, a keda demostra cu Parlamento no por carga e responsabilidad financiero. Manera Bon Dia Aruba a menciona na varios ocasion, Parlamento no ta cumpli cu nos propio leynan financiero. Entre otro, por menciona cu ley ta indica na ki fecha mester entrega presupuesto; sinembargo, presupuesto frecuentemente ta laat. Tambe segun nos propio Constitucion, mester entrega un cuenta anual, y nos gobierno historicamente tampoco ta cumpli cabalmente cu e rekisito aki.

Sinembargo, Gabinete Wever-Croes y mayoria di Parlamento ta insisti cu un RAft no ta necesario, y ta dispuesto pa carga e consecuencia.

Kico ta e consecuencia di no introduci e RAft?

Manera menciona caba, e RAft tabata un condicion pa ricibi interes abao pa e prestamonan tempo di pandemia. E consecuencia di no acepta e RAft ta cu Aruba tin cu paga interes halto pa e prestamo aki. Y ta pueblo di Aruba ta esun cu tin cu carga e peso di e decision aki. Opcionnan cu Aruba tin ta hopi limita, ya cu hasta si Aruba dicidi di laga Hulanda afo y financia riba mercado, no lo ta posible pa haya e interes asina abao cu Hulanda lo duna si Aruba introduci e RAft.

Mientras cu e negociacionnan aki ta andando, pueblo di Aruba tin cu paga alrededor di Afl. 30 miyon extra pa aña. E 30 miyon florin aki ta hopi necesario actualmente entre pueblo di Aruba, principalmente si tene cuenta cu e aspectonan social – manera pobresa, salud mental, y salud general – cu mester di atencion y cu a sufri recortenan. Tambe lo por inverti e placa den sector di cuido di anciano, cu tambe ta birando un crisis cu mester atencion urgente. Lo por mehora caretera, cu pueblo ta sclama dia pa dia mester di atencion, of lo por inverti den mehora e planta di procesamento di awa, RWZI na Bubali, cu tambe ta den un situacion precario. Lo por inverti den scol, den tra’i merdia, den subsidio; y por analisa si por baha algun di e cantidad di impuesto cu a aumenta y ta poniendo un peso enorme riba nos pueblo.

E escogencia aki ta keda na gobierno, sinembargo, ta pueblo tin cu carga e consecuencia.

Kico por spera di e bishita di Secretario di Estado?

Loke por spera ta cu e negociacion ta continua. Te unda cu Bon Dia Aruba por mira, y segun e declaracionnan di e Secretario di Estado mes, no tin hopi progreso riba e negociacion. Maske prome minister ta insisti cu e negociacionnan ta continua y ta bayendo bon, comienso di luna, ministerio di Asunto Interno y Asunto di Reino a confirma cu no tabatin desaroyo a pesar cu e combersacionnan ta continua. Kiermen no a yega na un acuerdo, ni tin un solucion riba mesa. Tampoco a mira mucho progreso den Parlamento riba e tema aki – no publicamente, al menos – cu por indica cu ta bay tin algun disposicion pa resolve e impasse cu Hulanda. Mientras tanto, pueblo ta keda paga.

Ta keda na pueblo awo pa dicidi si nos mes ta considera cu nos kier sigui paga 30 miyon florin pa aña simplemente pa Hulanda supervisa nos finanzas di tur manera. Y si nos dicidi cu no ta vale la pena, ta ora pa nos cuminsa acerca nos parlamentarionan – e supuesto representantenan di pueblo – pa laga nan sa cu ta ora pa acepta e RAft.