Den un carta dirigi na presidente di Tweede Kamer, Secretario di Estado pa Relacionnan di Reino, Alexandra van Huffelen a duna informacion tocante e resultado di un revision di politica pa e periodo di 2016-2022 pa paisnan Aruba, Corsou y Sint Maarten. Lamentablemente, e revision aki a conclui cu e esfuersonan pa mehora e maneho financiero di e paisnan autonomo no tabata efectivo.
Durante ultimo lunanan, SEO Economisch Onderzoek (SEO) a ehecuta e revision di politica Articulo 5 di presupuesto di Relacionnan di Reino. Den e articulo aki ta inclui e restructuracion di debe y prestamo na paisnan Aruba, Corsou y Sint Maarten. E revision ta abarca e periodo 2016-2022 y ta duna informacion tocante e logro di e obhetivonan politico premira y e efectonan di e politicanan implementa, segun e carta di e Secretario di Estado.
Den e informe final ta inclui evaluacionnan base y e evaluacion di e experto independiente. Tambe Van Huffelen ta indica cu ya anteriormente a informa Tweede Kamer tocante e diseño di e revision di politica y a responde preguntanan adicional.
Obhetivo y diseño di e revision di politica Articulo 5
Segun e Secretario di Estado ta bisa den su carta, e obhetivo di e revision ta responde e pregunta na ki punto e politicanan implementa durante periodo di 2016-2022 ta eficaz y eficiente. Cu e comprension aki, tambe por determina na ki medida e obhetivonan politico di Articulo 5 ta keda relevante, y den caso cu no ta asina, con por reforsa nan. E revision di politica ta cumpli cu rekisitonan di calidad estableci den e Reglamento di Investigacion di Evaluacion Periodico, RPE.
Firma di investigacion externo, SEO a haci e revision. E informe final ta basa riba e informenan di evaluacion. E evaluacionnan di e restructuracion di debe, e Ley di Reino pa Supervision Financiero (Rft) y e protocolnan entre Aruba-Hulanda tabata realisa pa Economisch Bureau Amsterdam (EBA). Ley di Supervision Financiero di Aruba (LAft) a keda fuera di e revision pasobra e ta un ley local di Aruba.
A traves di un grupo di consulta, paisnan Aruba, Corsou y Sint Maarten, y Colegio di Supervision Financiero (Cft y CAft) a participa den ehecucion di e revision di politica, y tabatin oportunidad pa duna comentario riba e diseño di e investigacion, e hendenan cu a entrevista, y e proyecto di informe final.
Por ultimo, un experto independiente a participa den e ehecucion di e revision.
Conclusionnan di e revision di politica Articulo 5
Na momento di analisa e eficacia y eficiencia di e instrumentonan utilisa, segun e carta di Van Huffelen, e revision di politica Articulo 5 ta duna un imagen mixto. Tocante implementacion di politica, e tabata en gran parti efectivo.
Implementacion (Rft, protocol Aruba-Hulanda, restructuracion di debe y prestamo) a conduci na transparencia y comprension di e finanzas di e paisnan, e provision di ayudo financiero pa enfrenta e consecuencianan di shocknan financiero y no-financiero, y e stabilidad financiero y confiansa den mercadonan financiero. Sinembargo, e implementacion aki tabata efectivo di manera limita pa loke ta alcansa e normanan financiero estableci den Rft y protocolnan di Aruba-Hulanda, como tambe tocante e sostenibilidad di finanzas publico y e desaroyo economico structural. Segun SEO, e esfuersonan pa mehora maneho financiero no tabata efectivo.
Segun e Secretario di Estado ta bisa den su carta, esaki ta keda refleha den e calificacion di eficiencia. E uso di prestamo di likides y prestamonan ocasional tabata eficiente. Sinembargo, pa e restructuracion di debe, Rft y e protocol Aruba-Hulanda, SEO ta considera cu e eficiencia tabata limita. E falta di mehoracion den maneho financiero di e paisnan ta un factor importante cu ta contribui na e conclusion aki, a pesar cu ya a duna inicio na esaki cu e restructuracion di debe, y ta un resultado directo di e politicanan Rft y e protocol Aruba-Hulanda.
E efectividad y eficiencia tambe ta limita pa e falta di implementacion di reforma economico structural y fortalecimento institucional. SEO ta indica cu e obhetivonan politico di Articulo 5 ta keda relevante.
Recomendacion
Basa riba e conclusionnan aki, SEO a elabora siete recomendacion, cual e Secretario di Estado a resumi den su carta.
E prome ta pa inclui di manera structural den e agenda politico e mehoracion di maneho financiero di e paisnan. Ta destaca e responsabilidad di e propio paisnan pa mehora e maneho financiero, organisa e capacidad necesario y establece e practicanan y cultura necesario pa un maneho financiero adecua.
Tambe ta recomenda pa reduci e prociclidad y enfoca riba e presupuestonan anual a traves di e desaroyo di un vision a largo plaso di e finanzas publico di e paisnan.
Pa di tres, specifica e aplicacion di algun disposicion di Rft, manera e forma den cual mester ehecuta e compensacion di deficit.
E di cuatro recomendacion ta pa desaroya y implementa un vision y un regimen pa maneha e impactonan di e shocknan externo na e paisnan.
Pa di cinco, crea un marco di evaluacion pa interaccion entre e diseño di e ayudo financiero pa e paisnan y e obhetivo di Articulo 5, cual ta pa logra finanzas publico sostenible y un desaroyo socio-economico structural saludable.
Tambe ta recomenda pa actualisa e evaluacion di prestamo di likides realisa na 2022, incluyendo e implementacion di landspakketnan.
Y di siete, considera e interrelacion entre Articulo 4 y Articulo 5 di Capitulo IV di Relacionnan di Reino den revisionnan futuro di e politicanan, evaluando unda tin areanan di conexion entre ambos.
Ademas, SEO ta sugeri cu por mehora cierto aspectonan door di haci cu e elementonan di e teoria di politica ta mas explicito den aplicacion di Articulo 5. Esaki ta referi principalmente na dos punto: E efectonan social, specialmente e necesidad di mantene finanzas di e paisnan den orden y mitiga e impactonan di shocknan financiero y no-financiero; y e consecuencianan a largo plaso, unda ta splica e relacion entre finanzas publico sostenible, desaroyo socioeconomico structural, y autonomia di e paisnan.
Proximo pasonan
Despues di gradici SEO y EBA pa nan investigacion, Van Huffelen ta indica cu den proximo simannan e ta bay analisa mas detenidamente e resultadonan di e revision y lo discuti esakinan cu e paisnan. Tambe el a indica cu lo tene cuenta cu e evaluacion di e experto independiente, y lo pidi opinion di Cft y CAft riba e revision di politica.
E estudio ta subraya e importancia di mehora e maneho financiero y ehecuta reforma economico structural. A traves di e landspakketnan, ya a corda medidanan pa mehora den e aspectonan aki, Van Huffelen ta enfatisa. Ta fundamental pa e paisnan asumi nan responsabilidad den e proceso aki. E revision Articulo 5 ta mustra un biaha mas e importancia di alcansa e metanan aki, e Secretario di Estado ta conclui.
