Prome Minister Evelyn Wever-Croes:
Diaranson 16 di februari mainta, Secretario di Estado Alexandra van Huffelen a yega Bestuurskantoor pa reuni cu Prome Minister Evelyn Wever-Croes y despues cu Conseho di Minister.
Tin hopi anticipacion pa e prome encuentro entre nos Prome Minister y Secretario di Estado. Un bon Relacion den Reino ta importante pa e recuperacion di Aruba.
Secretario di Estado van Huffelen ta haciendo bishita na paisnan di Reino den e parti di Caribe. Prome cu Aruba, van Huffelen a bishita Corsou y Boneiro. Despues e lo sigui pa Sint Maarten, Saba y Sint Eustasius. E intencion di su bishita ta pa e cera conoci cu e islanan y e gobernantenan pa asina conoce otro y establece un relacion tambe pa sigui traha hunto den e proximo periodo nos dilanti.
Durante e bishita di Secretario di Estado, Prome Minister Evelyn Wever-Croes a regala Secretario di Estado van Huffelen un set di habon di “Ha-Bon”.
Na entrega di e regalo, Prome Minister a splica cu esaki ta un gesto simbolico di ‘social entrepreneurship’. E habonnan aki ta wordo traha door di personanan cu un of otro limitacion.
E forma con ta envolve personanan cu limitacion den comercio, ta wordo hopi aprecia pa Prome Minister y ta bunita pa mira cu Secretario di Estado van Huffelen tambe ta comparti e aprecio aki.
