Dialuna merdia durante su bishita na Aruba den cuadro di e Consulta di Gobernadornan, Secretario di Estado Alexandra van Huffelen a reuni cu miembronan di e comunidad LGBT+. Un di e personanan cu tabata presenta na e encuentro aki tabata actual parlamentario y lider di fraccion ACCION 21 den parlamento, Miguel Mansur, ken a comparti e encuentro ariba su rednan social.

“Secretario di Estado Alexandra van Huffelen ta campeon indiscutibel di Reino y tur su constituyentenan. Awe e tabatin un reunion cu miembronan di comunidad LGBT+ y a discuti e progreso, desafionan y e caminda dilanti, unda mi tabata honra di participa,” Mansur a expresa.

“Tabata un oportunidad pa gradici’e pa su advocacia sin fin na nomber di e islanan, nan hendenan y su pasenshi generoso. Nos lo keda haya su falta y e persona cu ta bin na su luga tin sapatonan/hilchinan grandi pa yena. Nos ta spera di mir’e regresa den un rol den Reino den futuro cercano,” e parlamentario a finalisa su publicacion.

Manera ta conoci miembronan di e comunidad LGBT+ na Aruba tabata en espera di e veredicto di Corte di Casacion na Den Haag (Hoge Raad) den e caso di apertura di matrimonio pa pareha di mesun sexo na Aruba y Corsou.

Inicialmente Corte di Casacion a indica cu nan lo duna nan sentencia dia 31 di mei, diabierna awo, pero esaki a cambia aworaki y mester warda seis siman mas. Ariba e website di Hoge Raad den e articulo cu ta contene e conseho di abogado general pa loke ta e caso aki por mira cu e fecha nobo pa e veredicto den e caso aki a cambia pa dia 12 di juli 2024.

Pa loke ta e mesun topico aki, Parlamento di Aruba tambe tin un fecha nobo pa tratamento di e ley pa habri matrimonio pa pareha di mesun sexo. Manera ta conoci dia 8 di mei a tuma luga e prome reunion publico pa trata e ley aki, pero despues di aproximadamente 12 ora e ley a haya 10 voto na fabor y 10 voto contra, door di cual mester a pone un fecha nobo pa otro reunion publico pa por tene un votacion definitivo.

E siguiente reunion publico pa trata e ley pa habri matrimonio pa pareha di mesun sexo den Parlamento di Aruba ta tuma lo tuma luga dia 18 di juni 2024.

Potret: Pagina di Facebook parlamentario Miguel Mansur.