Dialuna mainta, Minister Presidente di Hulanda, Mark Rutte a ofrece su disculpa den nomber di gabinete pa e pasado di sclavitud di Hulanda. Dialuna atardi, Prome Minister di Aruba, Evelyn Wever-Croes hunto cu Secretario di Estado pa Husticia y Seguridad, Eric van der Burg a ofrece un conferencia di prensa relaciona cu e momento historico aki.

Minister Wever-Croes a resalta cu e disculpa di gabinete ta marca un dia historico. “E ta un dia cu nos antecesornan solamente por a soña di dje. Minister Presidente di Hulanda, Mark Rutte a brinda su disculpa pa e pasado di sclavitud. El a reconoce prome cu esaki tabata un delito contra humanidad y despues el a sigui na ofrece su disculpanan oficial.”

El a sigui indica cu aunke nan por duna nan comentarionan ariba e manera con e preparacionnan a tuma luga, pero “esey no ta kita cu e disculpanan bon intencion semper ta bon bini y cu nan ta den debe cu nos antecesornan pa busca reconocemento pa nan manera nan a ricibi awe.”

Prome Minister a remarca loke Minister President Rutte a bisa, esaki no ta punto, pero mas bien un coma, pasobra for di e momento aki nan lo bay sigui traha hunto, Aruba, Hulanda y henter reino Hulandes, pa e caminda di recuperacion, restauracion y reconciliacion.

El a enfatisa cu Gobierno di Aruba ta hopi agradecido na e gobierno Hulandes pa tuma e prome stap hopi importante aki y e ta keda awo na e generacion di presente, pa percura cu loke a pasa den pasado nunca mas pasa atrobe y p’esey hunto, nan lo tuma e siguiente stapnan pa preveni esaki. .

Pa loke ta trata Aruba, Wever-Croes a indica cu Minister di Cultura, Xiomara Maduro, a forma un comision cu for di 1 di juli di e aña aki ta trahando riba esaki y e deseo ta cu pa 1 di juli 2023 nan por presenta un plan concreto ariba kico tur esaki lo nifica pa Aruba.

Secretario di Estado Eric van der Burg, ken ta na Aruba den contexto cu e disculpa ofreci pa gabinete Hulandes, a resalta e importancia di e momento historico aki pa Hulanda, Aruba y henter Caribe Hulandes.

El a recorda cu den su discurso Minister Presidente Rutte tabata hopi cla tambe cu e ta agradecido tambe na e persona- y organisacionnan cu durante e ultimo añanan tabata trahando pa demostra con importante e ta pa Hulanda expresa nan disculpa y pa tin reconocemento di e delitonan cu a tuma luga contra e hendenan.

E secretario di Estado a comenta tambe cu dialuna mainta e tabatin un bunita reunion cu Prome Minister Wever-Croes, un reunion tambe, segun el a indica, caminda tabatin posibilidad di critica, por ehempel tocante e fecha cu a wordo scogi, ariba e proceso te cu awe durante cual algun cos no a bay di forma optimal entre otro, algo cu Minister Presidente Rutte a menciona tambe durante su discurso.

“Manera a wordo bisa caba, esaki ta e comienso di e trayecto pa nos sigui traha hunto pa mehoracion di e relacion entre Aruba y Hulanda, pero tambe e comienso di e trayecto pa e siguiente procesonan pa loke ta trata e topico di historia di sclavitud”, Van der Burg a bisa.

Fuera di esey, el a enfatiza cu ta hopi importante tambe pa reconoce fuertemente e pasado di sclavitud y tambe demostra con e efectonan di esaki ta permanece awendia den e bida di e hendenan como tambe den e sociedad.

Van der Burg a menciona cu durante su estadia el a bishita Archivo Nacional di Aruba tambe y el a remarca cu esey ta mustra con importante e ta pa den e archivo no solamente captura e historia, pero tambe pa haci e historia aki publico pa tur cu kier mira con e historia di e persona ey mes tabata, con e historia di e famia tabata, pero tambe kico e ta nifica pa e persona ey den presente y futuro.

Durante e oportunidad di miembronan di prensa, reportero di Bon Dia Aruba a puntra Secretario di Estado, kico nan lo haci contra e diferente formanan actual di sclavitud moderno y abuso. Van der Burg a splica cu el a bishita e ekipo cu ta ocupa su mes cu e trata y traficacion di personanan aki na Aruba.

El a enfatisa cu aunke el a bishita Aruba den nomber di e Gobierno Hulandes den contexto cu e disculpanan pa loke ta trata e pasado di sclavitud, diariamente como Secretario di Estado e ta responsabel di diferente temanan y dos di e temanan ey ta traficacion di hende y trata di hende, cual el a subraya ta di importancia pa su persona.

El a splica tambe cu e por a mira kico ta wordo haci caba na Aruba pa loke ta e tema aki y con nan ta tumando pasonan enormemente importante pa trece expertonan ariba kico ta traficacion di persona kico ta trata di persona, train hende den esaki, no solamente den direccion di polis pero tambe den direccion di Estado, den direccion di warda costa, den direccion di ambtenaarnan.

Secretario di Estado a agrega tambe trece e experticio pa loke ta trata siguimento di e persona cu ta culpabel di traficacion y trata di persona.

El a agrega cu no mester lubida cu tur persona mester presta atencion na e conscientisacion dentro di comunidad pasobra hopi hende no ta realisa e peliger di traficacion di persona.

“Loke nos ta wak tin biaha como djis condicionnan malo di trabou, of nos ta bisa cu e hendenan por bay, e hendenan por kita y bay haci algo otro. Pero ta trata aki di e explotacion di persona vulnerabel cu ta den un posicion di wordo explota y hopi biaha no por sali”, el a resalta.

El a enfatisa cu mester duna e estilo di sclavitud moderno, cu no ta comparabel cu local a discuti pero toch totalmente inaceptabel, prioridad como paisnan individual y tambe den colaboracion di e paisnan den necesidad.