Recientemente, Secretario di Estado di Digitalisacion y Relacionnan den Reino, Zsolt Szabó, a manda un carta pa Tweede Kamer informando parlamento, riba peticion di minister di Asuntonan di Reino, tocante e curso y resultado di e conferencia di tres dia ‘Taking the Reins: Aruba, Curaçao en Sint Maarten – Driving Their Economic Future’.
Den un carta data 10 di maart, Secretario di Estado a indica na Tweede Kamer cu autonomia economico ta e principio principal den su politica pa colaboracion entre Hulanda y e parti Caribense di Reino, den relacion cu temanan manera bon gobernacion y finanzas publico sostenibel.
El a splica cu e tres pais – Aruba, Corsou y Sint Maarten – tin autonomia pa desaroya nan propio curso economico; sinembargo, el a agrega, e desaroyo di e paisnan pa logra autonomia ta ser stroba pa algun desafio structural, manera: e escala limita di e economia na cada pais, e conexion logistico dificil, y e capacidad pa desaroya institucion adecua den un comunidad chikito. El a remarca cu e factornan aki tambe ta pone e paisnan den mas peliger pa golpi externo, sea ta di origen economico, geopolitico of climatico.
E desafionan aki ta mustra hopi parecido na esunnan di e Small Island Development States (SIDS), cu ta reconoci mundialmente como un grupo cu tin desafionan specifico den nan desaroyo. Den contexto di Nacionnan Uni, Secretario di Estado Szabó a indica, ta haci intercambio di conocemento y ta traha riba solucionnan pa e vulnerabilidadnan y stimula e autonomia economico di e tres pais Caribense.
E Secretario di Estado a splica cu via e “Landspakketten” cu a ser acorda den 2020 cu Aruba, Corsou y Sint Maarten, e Organisacion Temporal di Trabou (TWO) ta traha hunto cu e paisnan pa fortalece institucionnan den manera general, y pa formula politica den e area economico den manera specifico.
Den e contexto ey TWO y e tres ministerio di Desaroyo Economico di e paisnan a organisa un conferencia na nivel di funcionario, cu meta pa yega na un intercambio sostenibel di informacion y iniciativa comun riba desaroyo economico.
E Secretario di Estado ta remarca cu cooperacion ta un respuesta logico pa e limitacion di escala y e falta di capacidad institucional, y por yuda reduci e efectonan di shock externo.
El a splica cu e ministerionan di desaroyo economico di e paisnan Caribense ya ta traha hunto riba cierto tema, y den consulta cu TWO, nan a expresa e deseo pa explora mas e posibilidadnan di colaboracion, durante un reunion presencial.
El a sigui splica cu e meta di e evento tabata pa establece un programa regional di colaboracion riba cuestionnan economico. P’esey, e evento a enfoca riba intercambio, stimulacion di idea innovativo, y identificacion di areanan pa un colaboracion mas intensivo.
Secretario di Estado Szabó a informa cu e evento a conta cu participacion di mas o menos 50 persona, incluyendo presentadornan. E participantenan tabata representa diferente ministerio y organisacion publico di e cuater pais, incluyendo ministerionan di Asunto Economico, Banconan Central, y Rijksdienst voor Ondernemend Nederland (RVO). Presentadornan regional y internacional di entre otro e bureau di SIDS, Nacionnan Uni, CARICOM, y University of the West Indies, a complementa e experticio di e participantenan for di Aruba, Corsou y Sint Maarten.
Secretario di Estado Szabó a informa cu e programa di e conferencia a dura tres dia y durante e prome dia a enfoca riba un ampliacion di e desaroyo economico di Aruba, Corsou y Sint Maarten, y un exploracion di e maneho di SIDS. E di dos y di tres dia tabata enfoca riba intensificacion di colaboracion, mediante dies mesa rondo. Pa cada mesa, a asigna un “campeon” como punto di contacto pa e proximo paso.
Na fin di e evento, un declaracion final comun y pasonan concreto pa sigui pa dilanti a ser presenta. E Secretario di Estado a remarca cu a pone enfasis specifico riba e integracion di e municipionan special —Boneiro, Saba y Sint Eustatius—den e siguimento di e proceso.
E declaracion final ta lo siguiente:
“For di 29 te 31 di januari 2025, e paisnan di Caribe Hulandes a yega hunto pa discuti e oportunidadnan pa colaboracion economico. Nos ta declara cu nos tin disposicion pa colabora entre nos mes, den e paisnan di Caribe Hulandes, pa logra un meta comun. Ademas, comprendiendo e importancia di colaboracion cu tur seis isla di e Caribe Hulandes, nos ta disponibel pa explora e oportunidadnan pa colaboracion cu Boneiro, Saba y Sint Eustatius.
E yamada pa un plataforma (virtual) pa consulta structural ta surgi for di varios discusionnan tocante un futuro economico sostenibel pa e seis isla di e Caribe Hulandes.
Ademas, e rol di dato como un recurso strategico y e colecta y uso di dato pa politica y toma di decision basa riba evidencia, ta un prioridad pa desaroyo regional.
Despues di asisti e conferencia, nos ta compromete y ta garantisa cu nos lo traduci e resultado den accionnan concreto. Asisti un conferencia no ta suficiente; e reto di berdad ta sigura cu e discusionnan aki ta bira accion concreto, cuminsando diabierna, ora nos lo identifica e tres areanan principal pa colaboracion y cuminsa discusion riba nan den nos proximo reunion.
Reconociendo cu decision final ta na nivel politico, nos ta compromete pa informa y motiva esnan cu ta tuma decisionnan den nos paisnan. Nos lo nombra un lider di proyecto pa guia e siguiente pasonan.”
Secretario di Estado Szabó a splica cu a ser acorda cu e resultado di e evento lo ser traduci den accionnan concreto, y cu identificacion di e tres prioridadnan principal ta e prome paso den e proceso. El a agrega cu tambe a ser expresa cu un lider di proyecto lo wak riba e ehecucion di e siguiente paso y lo monitor e acuerdonan.
Ademas, tambe a realisa un priorisacion di e temanan trata y e siguiente paso, cu e tres paisnan di Caribe Hulandes kier tuma hunto, y e caminda deseabel y posibel, cu sosten di TWO.
Esaki, el a indica, a resulta den e siguiente top tres prioridadnan.
Primeramente seguridad alimentario; esaki ta enfoca riba colaboracion entre isla y medionan disponibel pa garantisa seguridad alimentario. E posibel siguiente pasonan ta bira exploracion di posibilidadnan pa forma un tipo di colaboracion; apoya e agricultornan chikito den manera di reduccion di gasto di transport, compras conhunto y distribucion di producto agricola; desaroyo di politica cu ta enfoca riba implementacion di regla y medida pa regula y stimula diferente forma di agricultura; y dato y investigacion cu tin como punto di enfoke colaboracion cu universidadnan pa fortalece e colecta di dato y investigacion relevante.
Siguiente prioridad ta comercio y conectivitad. E posibel siguiente pasonan pa esaki ta inclui formacion di un comision entre e islanan pa comercio y conectivitad pa stimula colaboracion structural den e area aki. Ademas tambe ta mira pa investiga e posibilidad di un tratado di “open skies” y un zona economico comun entre e seis isla, y desaroyo di politica riba compras conhunto den region.
Di tres y ultimo prioridad ta economia blauw (blue economy) cu ta enfoca riba sectornan maritimo y di yate di placer. Pa loke ta e posibel siguiente pasonan, esaki ta inclui intercambio di informacion pa formulacion di politica, por ehempel ordenansa espacial maritimo y maneho sostenibel di e recursonan di lama; establece standardnan (ambiental) y haci negociacion comun, por ehempel cu compania di crucero. Tambe ta enfoca riba intercambio di conocemento pa stimula intercambio regional di tecnologia relaciona cu ocean, manera enfriamento di hotel cu awa di lama.
Pa finalisa e carta Secretario di Estado Szabó a remarca cu den e proximo periodo e lo sigui traha cu e gabinete riba desaroyo economico y autosuficiencia di e parti Caribense di Reino y lo sigui vigila y promove cooperacion entre e paisnan.
