Secretario di Estado Szabo: Hulanda no lo contribui den fondo di inversion

Secretario di Estado pa Relacionnan di Reino, Zsolt Szabo, kende awe ta programa pa yega pa un bishita na Aruba, a contesta algun pregunta di prensa local relaciona cu e propuesta di Gabinete AVP-Futuro, pa converti e debe cu Aruba tin cu Hulanda di tempo di Covid, den un fondo di inversion.

“Den mi opinion, un fondo di inversion ta un bon idea,” e Secretario di Estado a bisa Tito Lacle di NoticiaCla durante weekend. “Economia tambe ta desaroyando na Aruba, pues ohala tin recurso tambe pa yena un fondo asina.”

E propuesta di AVP ta pa Hulanda converti e debe di tempo di pandemia den un fondo di inversion. Hulanda ta parce di no ta di acuerdo cu esaki, pero si ta haya bon pa Aruba mes bin cu un fondo di inversion, pero segun e Secretario di Estado, ta keda e propio responsabilidad di Aruba pa bin cune.

Szabo a indica cu mester yena e fondo di inversion cu recursonan di Aruba mes, por ehemplo, di e surplus. Segun Szabo, ta logico cu Hulanda no lo contribui na e fondo: “Bo tin cu yena esey cu bo propio recursonan, pasobra si no, y bo pidi Hulanda pa contribui na esey, e ora bo ta en realidad pidiendo e pagador di belasting Hulandes pa yena un fondo di inversion di un pais autonomo manera Aruba,” Szabo a bisa NoticiaCla, enfatisando cu no ta bay ni considera e opcion aki.

A pesar di a bisa esaki, e Secretario di Estado a indica cu Hulanda si ta contribui, pero no cu inversion directo den un fondo di inversion. “Pa medio di e landspakketnan nos kier contribui na un desaroyo economico, manera digitalisacion, auto-suficiencia, reforma di sistema di impuesto, modernisacion di sistema di impuesto,” Szabo a bisa. Sinembargo, el a nota cu e contribucion aki tampoco ta pa semper, sino ta caduca den un periodo di dos aña, manera NoticiaCla a reporta.

E Secretario di Estado ta keda enfatisa e tres punto clave di su maneho, cual ta bon gobernacion, finanzas solido y auto-suficiencia economico. Pues maske ta haya un bon idea pa Aruba bin cu un fondo di inversion pa proyecto economico, e idea di converti e debe actual di tempo di pandemia den e fondo aki, no ta haya aprobacion di e mandatario.

Bishita na Aruba
Manera publica siman pasa, Secretario di Estado Szabo ta programa pa un bishita cuminsando awe, diamars 8 di april, na Aruba. Aki e ta bay reuni cu e Gabinete nobo, lidera pa prome minister Mike Eman, como tambe miembronan di Parlamento di Aruba.

Un enfoke clave di e bishita ta bay ta bon gobernacion. Szabo ta bay atende un lectura na Universidad di Aruba, di Mieke de Droog, director di programa di e Instituto Arubano pa Bon Gobernacion y Liderazgo, sigui pa un sesion interactivo di pregunta cu studiante.

Den linea cu su prioridadnan di auto-suficiencia economico, bon gobernacion y stabilidad financiero, Szabo ta bay inaugura un sucursal nobo di Pro-Tec, un compania di instalacion tecnico specialisa den friamento di edificio usando awa di lama. Pro-Tec recientemente a ser adkeri pa compania Hulandes, Van Dorp.

Diaranson 9 di april, e Secretario di Estado lo continua su bishita den Caribe na Corsou, unda e lo participa den e Consulta di Aña di Gobernador, un reunion bianual cu ta tuma lugar alternando entre Hulanda y e teritorionan Caribense, cu ta trece hunto e Gobernadornan di Aruba, Corsou y Sint Maarten.