Durante un conferencia di prensa di prome minister Evelyn Wever-Croes ayera mainta, el a anuncia cu secretario di Estado Raymond Knops lo bin di bishita awe 5 di januari y mañan dia 6. Durante su bishita e lo tin varios reunion cu ministernan di manera individual y cu conseho di minister tambe.
Prome minister a enfatisa cu e obhetivo di su bishita ta atende e tema di landspakket pa asina nan hunto por delibera riba tur e condicion cu ta poni den e landspakket y pa mira unda tin mester di mas asistencia of mas clarificacion.
Di esaki, el a sigura cu 1 di februari nan mester yega na loke nan ta yama un Uitvoeringsagenda loke ta nifica un palabracion di ki tempo of ki aña ta bay ehecuta cua di e diferente puntonan di e landspakket pa lo cual prome minister a expresa cu Aruba ya ta preparando pa presenta esaki di nan parti, lo cual nan ta kere cu nan por yega di cumpli cune.
Tambe el a informa cu loke tabata trata di e deadline pa e cumplimento di e landspakket di 15 di december nan a cumpli cu nan, 1 di januari a cumpli cu casi tur cos segun loke el a sigura y loke nan no a logra ta den proceso legislativo pero nan si ta encamina caba sea na Raad van Advies of na Parlamento pa asina por wordo trata.
