Hulanda mes lo percura pa areglo pa salarionan mas halto ta cumpli cu locual a acorda

Aruba ta sigui e agenda di ehecucion y hasta pa e di tres kwartaal di 2021 a logra cumpli cu tur e fechanan determina den e agenda, cu ta parti di e landpakket pa Aruba. Pero e falta di logra e reduccion di 60 miyon riba gasto di AZV, entre otro door di para e tarea cu a haya pa e seguro medico general ta preocupante y no a introduci maximalisacion di salario pa funcionarionan halto den sector publico y semi publico.

Asina Secretario di Estado Demisionario pa Asuntonan di Reino, drs. Raymond Knops a informa Tweede Kamer e siman aki riba e proceso di decision di Conseho di Minister di Reino riba e sosten di likides di e cuater kwartaal di 2021 pa Corsou, Aruba y St. Maarten.

E Secretario di Estado a ripiti cu a yega na un acuerdo cu Corsou, Aruba y St. Maarten, paisnan CAS na fin di 2020 riba e landspakketnan.

Esakinan ta inclui reformanan acorda cu tin como meta pa fortifica resiliencia financiero, economico, institucional y social di e paisnan di tal manera cu nos paisnan mes por wanta shocknan externo den futuro. Como condicion pa ricibi e sosten di likides, e tres paisnan mester ehecuta e reformanan y pa esaki Conseho di Minister di Reino ta reuni cada kwartaal pa tuma decision riba e necesidad financiero. Y esun cu ta duna conseho ta College (Aruba) financieel toezicht, CAft. Y e ultimo reunion di Conseho di Minister di Reino, unda tabatin e punto di agenda, decision pa e di cuater kwartaal 2021 y cuanto por desvia di e normanan presupuestario pa henter 2021 tabata dia 24 di September ultimo. Y manera ta conoci, durante e reunion ey, Conseho di Minister di Reino a para e sosten di likides.

Den su splicacion, drs. Knops a bisa cu desde comienso di 2021 ta trahando cu e paisnan pa duna contenido na e landspakketnan. E palabracionnan concreto ta stipula den e agenda di ehecucion cu ta valido pa cada kwartaal. E agenda di ehecucion ta basa riba e palabracionnan di cada pais cu Hulanda. E agenda di ehecucion pa Aruba como tal por ta diferente cu esun di Corsou of St. Maarten. E palabracionnan ta indica cua ta e resultadonan cu kier logra y ta guia e actividadnan cu mester keda ehecuta.

Progreso ta varia

E progreso, Knops a informa Parlamentarionan Hulandes, ta varia. “Aruba ta sigui e agenda di ehecucion y a logra cumpli cu tur plazonan stipula cu mester a sosode den e di tres kwartaal. “Pero, e progreso pober riba e reformanan structura den cuido di salud, particularmente causa pa motibo cu a trece un paro riba e obhetivo di AZV ta preocupante,” e Secretario di Estado a informa Tweede Kamer. Tambe el a papia di Corsou, cu si a conoce un retraso den cumpli cu e agenda di ehecucion den e di tres kwartaal. Mas ainda no a ni stipula e di cuater agenda di ehecucion. St. Maarten tambe a logra cumpli cu mayoria di e plazonan (deadlines), pero no a cumpli cu tur palabracion den e periodo determina. E capacidad disponible na St. Maarten pa ehecucion di e medidanan ta keda un punto di preocupacion pa Hulanda.

E Parlamentarionan Hulandes a ricibi informacion detaya riba e progreso na nivel di pais. No por a duna nan e agenda di ehecucion pa e di cuater kwartaal ya cu esakinan no a keda cla y nan lo bay Tweede Kamer despues.

Aruba

Como condicion pa e di siete tranche di sosten di likides, Aruba mester a presenta un plan di accion bon argumenta hunto cu CAft riba e recortenan anual di 60 miyon na AZV. Conseho di Minister di Reino a constata cu Aruba ainda no a cumpli cu e condicion aki. Banda di esey, na momento cu Conseho di Minister di Reino mester a tuma su decision riba e di siete tranche di sosten di likides, Aruba ainda tabata den discusion cu CAft riba e necesidad financiero. Esey ta motibo, segun Raymond Knops pakico Gobierno di Reino a dicidi pa wanta e decision riba e sosten y consecuentemente tambe e decision riba cuanto por desvia di e norma pa e saldo financiero pa henter 2021. E decisionnan aki ta wanta te cu e siguiente reunion di Conseho di Minister di Reino cu ta riba agenda pa 29 di October.

Pa Gobierno di Reino por yega na un decision na October riba e di siete tranche di sosten di likides, Aruba mester presenta CAft un plan di accion adecuado y bon funda riba con na 2021 y despues lo duna contenido na e recortenan di 60 miyon den AZV.

Corsou

Conseho di Minister di Reino no por a evalua na ora si berdad Corsou a cumpli cu condicionnan. E agenda di ehecucion no ta stipula y e plan di accion den concepto riba implementacion di e pakete di medida riba e fondo di reserva na e Banco di Seguro Social ainda no ta presenta. Locual si a entrega ta e plan di accion relacion cu reforma di e cuadro financiero y di servicio di belasting, y minimalisacion di e perdidanan na e Centro Medico Corsou. Pero, nan a yega mucho laat pa Tijdelijke Werkorganisatie, TWO, cu ta anticipa e COHO, por a evalua nan y manda nan pa e reunion di Conseho di Minister di Reino. Como tal no por a trata nan. Mas ainda, Gobierno di Corsou a duna di conoce di kier drenta den dialogo cu Cft riba e necesidad di likides pa e ultimo kwartaal di 2021. P’esey, mescos cu ta e caso di Aruba, a wanta cu tur e decisionnan te cu October, basta cu cumpli cu tur condicion.

St. Maarten

Di su banda, St. Maarten si a cumpli grandemente cu e condicionnan estableci pa Gobierno di Reino, cu a aproba e pago di 22 miyon florin na sosten di likides pa e di cuater kwartaal. St. Maarten por desvia di e norma presupuestario te na maximo e sosten di likides cu ta ricibi di Hulanda, e medionan financiero presente pa prome di Januari 2021 y cualkier prestamo, menos e parti di e sosten cu ta reserva pa pago di capital. Asina a yega na e suma di 174 miyon florin cu St. Maarten por desvia di dje. Pero pa por bin na remarca pa e di ocho sosten di likides, St. Maarten mester completa e control riba e areglo di subsidio di salario y raporta esaki na Cft.

Maximalisacion di salario pa top funcionario

Na riba 15 di Mei 2020, Conseho di Minister di Reino a pone como condicion pa duna sosten di likides, cu e salarionan di e funcionarionan mas halto den e sector (semi-) publico di e paisnan CAS, incluso Aruba mester a keda maximalisa na 130 porciento di e salario normativo di Prome Minister. E paso aki mester a sosode dia 1 di Juli 2020. E salario maximo ta inclui un maximalisacion di e condicionnan laboral secundario y e mesun areglo mester a keda introduci pa e tarifanan di personanan cu ta traha como consehero (consultants).

Raymond Knops a bisa cu a haci un investigacion pa compara e proposicionnan di ley y conclui cu tin diferencianan grandi entre e conceptonan pa e areglo di salario di e paisnan y cu e areglonan riba puntonan importante no ta suficientemente efectivo.

Pa tal motibo mes Conseho di Minister di Reino a dicidi cu tanto Corsou, St. Maarten y Aruba mester trece e contenido di textonan di e concepto di ley riba maximalisacion di salario di funcionarionan halto den sectornan publico y semi publico riba e liña di decisionnan cu Gobierno di Reino a haci. Esey mester sosode mas pronto posibel. Hulanda kier a textonan cla pa prome cu November 1, 2021. Ademas, Conseho di Minister di Reino a formula algun punto cu mester ta inclui den e areglonan aki, pa asina aumenta nan efectividad. Entre otro, e puntonan cu mester ta inclui ta e base pa calcula e salario maximo, su alcance y implementacion.