Dialuna mainta 12 di augustus, Prome Minister Evelyn Wever-Croes a reuni cu e Secretario di Estado nobo pa Relacionnan di Reino y Digitalisacion, señor Zsolt Szabó. Recientemente ya e dos mandatarionan a cera conoci via un reunion virtual, pero esaki tabata e prome biaha cu Prome Minister y e Secretario di Estado a topa personalmente.

Secretario di Estado Szabó tabata acompaña pa un delegacion di Hulanda y tambe tabata presente un representante di VNO (Vertegenwoordiging van Nederland in Oranjestad), señor Vincent Storimans, y representante di VNACS (Vertegenwoordiging van Nederland in Aruba, Curaçao en Sint Maarten), señor Edson Hato.

Despues di e reunion cu Prome Minister, a sigui un reunion cu Conseho di Minister di Aruba y despues a duna un presentacion di e Landspakket na e Secretario di Estado. Ademas di e reunion cu Prome Minister di Aruba y Conseho di Minister, Secretario di Estado Szabó tambe a reuni durante su bishita na Aruba cu Gobernador di Aruba, S.E. Alfonso Boekhoudt, cu Presidente di Parlamento señor Edgard Vrolijk y lidernan di fraccionnan den Parlamento.

Esaki ta e prome bishita di trabao di e Secretario di Estado nobo na e islanan di Reino den e parti Caribeño. E prome bishita aki ta principalmente pa e Secretario di Estado conoce e islanan y e mandatarionan. Secretario di Estado Szabó ta na Aruba for di 11 pa 13 di augustus y despues lo biaha pa Corsou y Boneiro.

Segun un comunicado di gobierno, secretario di Estado Szabó a expresa di ta impresiona con Prome Minister ta wak e futuro di Aruba, esaki cu un punto di bista riba termino largo cual ta algo cu su persona tambe ta haci na Hulanda.

“Secretario di Estado Szabó a remarca cu e ta hopi agradecido na Aruba pa e hospitalidad. El a conoce y combersa cu hopi hende amabel y esey a dun’e diferente perspectiva riba varios punto importante. E reunionnan a bay hopi bon. A haci palabracionnan di con den futuro lo bay traha y comunica cu otro, sperando cu lo sigui cu e bon relacion di trabou y e cooperacion entre e dos paisnan”, Prome Minister a indica.

Ken ta Secretario di Estado Zsolt Szabo?

Zsolt Szabó, naci na 1961, a bira e di dos Secretario di Estado den combina Relacionnan di Reino y Digitalisacion, despues di Alexandra van Huffelen di D66. E ta forma parti di partido PVV.

Segun NOS ta informa, Szabo ta bin di Capgemini Nederland BV, unda desde 2007 el a desempeña como vice-presidente enfoca riba e prestacion di servicio den sector publico. Capgemini ta proveedor di ICT dominante den proyectonan gubernamental, segun un evaluacion reciente di iBestuur. Ademas, e tabata presidente di Fundacion Infofilter, cu ta gestiona e registro “No yama mi”, y vice-presidente di Conseho di Administracion di ECP.nl. Su perfil di LinkedIn tabata menciona tambe cu e tabata miembro di conseho asesor di un red empresarial di Hungria.

Segun binnenlandsbestuur.nl, di 2003 pa 2006, Szabo tabata vocero di fraccion VVD pa ICT y cooperacion pa desaroyo, y di dos vocero pa Asuntonan Exterior. E tempo aya, e tabata considera como un oponente declara contra e uso di software di codigo abierto di gobierno (“fetichismo OSS”). Sinembargo, e software di codigo abierto (open-source) y e trabao cu metodologianan di codigo abierto a converti den e norma dentro di gobierno y ta un medio pa fortalece e independencia digital di gobierno for di empresanan grandi di IT.

For di su puesto den Capgemini, el a boga durante añas pa e necesidad di un bon colaboracion entre gobienro y entidadnan di mercado. “E cambionan cu e transformacion digital ta trece cune ta asina grandi cu por gestiona nan bon solamente door di colaboracion entre gobierno y mercado.”

En general, Szabo tin confiansa total den digitalisacion: den su columnanan pa AG Connect di 2017 y 2019 el a describi e embehecemento di poblacion como un oportunidad pa prestacion di servicionan publico digital, criptomonedanan como algo mas cu un moda, y e drone como un solucion pa trafico. Tocante e posibilidadnan di tecnologia, el a skirbi na 2017 e buki “ICT di links pa rechts. Den interseccion di ICT, politica, gobernansa y sociedad.”

Szabo a studia ciencia politico na Vrije Universiteit Amsterdam. Prome cu yega Tweede Kamer, e tabata director di Politica di Informacion di Sector Publico den ministerio di Interior durante menos cu un aña. E tabata miembro di conseho di administracion di Openet Telecom y gerente na CMG Telecommunications.

Como Secretario di Estado pa Digitalisacion y Relacionnan di Reino, e ta bao direccion di Ministerio di Interior y Asunto di Reino, BZK, unda ex-hues y diputado Judith Uitermarkt tin control. E number tres di Nieuw Sociaal Contract, NSC, ta critica e postura cada bes mas empresarial di gobierno pa cu ciudadanonan den un sociedad compleho. “Gobierno no ta un empresa,” segun website di NSC ta afirma.

Contestando pregunta di dossierkoninkrijkrelaties si a nomin’e pa su posicion den gobierno pa motibo di digitalisacion of pa afinidad cu Caribe, Szabo a contesta: “Cu a bin cerca mi pa e cartera aki na final tin di haci cu mi trabaonan di añas den digitalisacion.” El a agrega cu como miembro di Tweede Kamer, e tabata vocero di Defensa y den e periodo aki a bishita Corsou y Sint Maarten. “Mi ta contento cu den e acuerdo di gobernacion, e partidonan ta considera e islanan como valioso. Mi ta anticipa mi bishita y pa conoce e islanan di nobo.”

Tocante e fusion entre tecnologia y Asunto di Reino, el a bisa cu drones por tin un uso mas inteligente na e islanan, “por ehemplo como drone medico pa duna cuido di salud, entre di remedi pa sanger y muestra diagnostico riba y entre e islanan. Pero tambe pa transporte di residentenan entre e islanan, como atraccion pa turistanan bula den nan, inspeccion di infrastructura fisico y e compromiso pa agricultura di precision. Mi ta bay evalua seriamente e sorto di innovacionnan aki den mi cartera di Relacionnan di Reino.”