Secretario di Estado di Relacionnan den Reino y Digitalisacion, Zsolt Szabó lo ta bishitando e islanan den Caribe Hulandes cuminsando desde 11 di augustus te cu 16 di augustus. Secretario di Estado Szabó ta bay realisa un bishita di trabao na Aruba, Corsou y Boneiro.
Esaki ta bay ta e prome bishita di trabao di e Secretario di Estado nobo pa e islanan di Caribe Hulandes. E prome bishita aki ta principalmente pa e Secretario di Estado conoce e isla- y mandatarionan. Durante su bishita e lo cera conoci cu entre otro gobernador-, prome minister- y otro ministernan di Aruba y Corsou, como tambe e gezaghebber di Boneiro.
Aruba ta e prome isla riba agenda di e Secretario di Estado Szabó. E bishita di trabao ta cuminsa dia 11 di augustus durante cual e ta cera conoci cu gobernador Alfonso Boekhoudt, prome minister Evelyn Wever-Croes y otro ministernan di Gabinete Wever-Croes II.
Ademas, Secretario di Estado Szabó ta bay tin un encuentro cu presidente di Parlamento di Aruba, Edgard Vrolijk y e ta bay cera conoci tambe cu parlamentarionan cu ta miembro di e Comision di Relacionnan den Reino.
Durante su estadia na Aruba e Secretario di Estado lo pasa bishita KIA y Archivo Nacional Aruba, e lo realisa un recorido den San Nicolas y e ta bay tin un encuentro cu representantenan di sector empresarial. Ademas e ta bay haya un presentacion di progreso di e Landspakket.
Despues di su bishita na Aruba di dos dia, diamars 13 di augustus e Secretario di Estado lo biaha pa Corsou na unda, igual cu na Aruba, e ta cera conoci cu gobernador, prome minister, presidente di parlamento y miembronan di Comision di Relacionnan den Reino di parlamento.
Secretario di Estado Szabó lo ricibi un tour di e isla y lo tin un encuentro cu e Comision di Reforma Nacional y presidente di Banco Central di Corsou, entre otro.
Su bishita di trabao pa e islanan ta finalisa na Boneiro na unda e ta bay cera conoci cu e geazhebber nobo na Boneiro, John Soliano y e representante di Reino interino Jan Helmond.
Su bishita na Boneiro ta inclui tambe un tour di e isla, introduccion cu e miembronan di e Conseho Ehecutivo y miembronan di e Dialogo Central, un organo consultativo local di doñonan di trabao, sindicatonan, gobierno local y e Camara di Comercio.
Zsolt Szabó a asumi su cargo como Secretario di Estado di Relacionnan den Reino y Digitalisacion desde 2 di juli 2024, na momento cu e gobierno nobo, Gabinete Schoof I a keda instala. Szabó ta sucesor di ex Secretario di estado, Alexandra van Huffelen ken a eherce e cargo desde januari 2022 te 1 di juli 2024.
