Gobierno na Den Haag cu berguensa ta admiti cu nan propio comisarionan interino ocupando gobierno na St. Eustatius aparentemente a duna contractnan di gobierno pa cierto trahadonan publico, cual ta ilegal.
Segun fuente BES Reporter, como respuesta riba contestanan riba e propio matutino y tambe Koninkrijksrelaties.nu, Raymond Knops, secretario di estado di relacionnan di Reino a informa Tweede Kamer ayera di e violacionnan cu a tuma luga na e gobierno local.
‘Den futuro lo percura pa gobierno no faborece companianan cu tin doño trahando den propio aparato gubernamental y tambe lo sigura cu nan no por participa den destaho’, sr. Knops a bisa despues di declara cu el a duna instruccionnan na comisario di gobierno Mike Franco pa cumpli cu ley den futuro.
E incidente aki no ta para riba su mes, segun e matutino, mirando cu un resumen haci pa e ministerio a revela cu 3 otro empleado publico cu ta doño di nan propio compania ya caba a ehecuta un total di 13 tarea, specificamente pa repara casnan na cual e horcan a trece daño. Sr. Knops a nota cu no por exclui cu tal practica tuma luga den situacionnan extraordinario manera recien a pasa cu e horcan, mirando cu simplemente no tin otro proveedo. Den un carta sr. Knops a conclui cu ‘pa e rason aki mi ta investigando si regulacionnan actual ta suficientemente apto pa un isla riba escala chikito’.
