Reciente Secretario di Estado di Transporte Publico y Medio Ambiente a contesta pregunta manda door di miembronan di Tweede Kamer, White y Gabriëls, tocante e politica di economia circular den Caribe Hulandes.
Contestando e pregunta tocante kico ta e politica di economia circular den Caribe Hulandes, Secretario di Estado Jansen a splica cu e Plan di Politica di Naturalesa y Medio Ambiente pa Caribe Hulandes 2020-2030 (NMBP) cu a keda estableci den 2020 pa e Reino Hulandes y e cuerponan publico, ta dirigi principalmente riba conservacion di e ecosistema di coral.
El a indica cu e maneho sostenibel di desperdicio ta un parti importante pa logra e meta strategico aki. Pa logra e obhetivonan, e NMBP a establece algun meta intermedio. Algun di e metanan aki ta yuda na e transicion pa un economia circular, entre otro: termina cu tiramento di desperdicio na dump, door di inversionnan den maneho y recuperacion di desperdicio mas avansa; inverti den negoshinan cu ta usa plastic of desperdicio solido pa produci producto nobo; y implementa prohibicion riba plastic di un solo uso.
Secretario di Estado Jansen a sigui splica cu apart di proteccion di e ecosistema di coral, un meta strategico den e NMBP ta uso sostenibel di tera y awa pa desaroyo di economia local. E obhetivonan pa e meta aki tambe ta contribui na e transicion pa un economia circular, desaroyo di economia local basa riba uso sostenibel di capital natural.
Algun di e metanan intermedio pa logra e obhetivonan aki ta: facilita uso sostenibel di awa residual y otro tipo di desperdicio pa produccion agricola; desaroya un strategia pa stimula produccion circular, alinea cu e strategianan di economia circular di Union Europeo.
Contestando e pregunta kico ta e pasonan cu e ta tuma pa combati polucion di plastic den Caribe Hulandes, y kico Hulanda por haci pa yuda reduci polucion di plastic den e paisnan autonomo di Reino, Secretario di Estado Jansen a splica cu Caribe Hulandes ta consciente di e consecuencianan dañino di no maneha e desperdicio di plastic na e manera corecto den e islanan.
Pa esaki, el a indica, no tin necesidad di un direccion for di Hulanda. Sinembargo, el a agrega, Hulanda por yuda streamline y coordina e conocemento cu tin den diferente parti di Reino.
El a remarca cu fortalece e colaboracion entre e islanan, incluyendo e paisnan autonomo di Reino, por yuda reduci polucion di plastic y otro tipo di polucion ambiental. Den esaki, el a subraya, e eficiencia di maneho di desperdicio di plastic por sigui mehora door di colaboracion regional.
Tocante kico ta e situacion di maneho di desperdicio den e paisnan autonomo den Reino na e momento aki, y cuanto porciento di e desperdicio ta ser tira na dump, kima, recupera of reusa, e Secretario di Estado a splica cu Aruba, Corsou y Sint Maarten, como paisnan autonomo den Reino, tin un responsabilidad independiente pa desaroya nan propio politica ambiental y ta completamente responsabel pa e ley y maneho di desperdicio den e pais.
El a indica cu tur e paisnan autonomo den Reino ta enfrenta desafio similar na e maneho di desperdicio. E problema di falta di un escala adecua, y isolacion relativo di cada isla, e limitacion di espacio pa trata desperdicio di manera integral, y tambe e gasto halto pa transporta desperdicio for di e islanan ta haci e situacion complica.
El a remarca cu cada isla tin su propio desafio den e contexto aki y pa logra un maneho sostenibel di desperdicio, ta necesario pa cada isla tin un vision cla di su situacion final di maneho di desperdicio. Esaki, el a indica, ta inclui un sistema di monitoreo continuo pa sigui di cerca cuanto desperdicio ta ser genera, unda e ta surgi, y kico ta ser haci cu e desperdicio.
E Secretario di Estado a indica cu pa Aruba, e politica actual pa maneho di desperdicio ta describi den e Politica di Maneho di Desperdicio (Aanpak Afvalbeheer) 2022-2025.
E documento ta remarca cu e forma cu Aruba como pais ta maneha desperdicio solido y likido no ta sostenibel ni responsabel. Den esaki a ser referi specificamente na e dump Parkietenbos y e planta di RWZI na Bubali. Sinembargo, e problematica di desperdicio no ta limita na e dos instancia menciona. Mester pone atencion riba problemanan relaciona cu tambe por tin efecto negativo riba nos salud, economia, naturalesa y medio ambiente, por ehempel, dump ilegal, mantencion y capacidad di e varios planta di RWZI.
Varios estudio a indica cu e dump di Parkietenbos no por keda manera e ta actualmente. E dump no por ser cera tanten cu no tin un plan integral di maneho di desperdicio (incluso un Landfill Sanitario). E documento ta subraya e necesidad pa bin cu un cambio pa rehabilita e area pa asina atende cu e estado degrada di e rif di coral y mangel.
Solucionnan dirigi riba e mehoracion di e procesamento di desperdicio tambe ta trece e problematica di recogemento di desperdicio cune. Den e cuadro aki ta enfatisa e urgencia di e situacion financiero y necesidad di mehora e operacion di e compania estatal Serlimar.
Di otro banda e situacion di RWZI ta uno preocupante, muy en special e planta situa na Bubali. Gobierno di Aruba tabata na altura pa varios aña caba di e inversion necesario pa mantene e planta y atende cu e problema di sobrecapacidad cu ta causa molester y ta afecta e bida marino. E inversion necesario a ser posponi di tal forma cu awor e planta di Bubali mester di renobacion completo cu un costo di alrededor di 60 miyon florin.
Politica di Maneho di Desperdicio (Aanpak Afvalbeheer) 2022-2025 ta subraya cu creando un sector di desperdicio circular fuerte door di restructura e sistema di desperdicio di Aruba for di un perspectiva di cadena di balor, basa riba ciencia, dato y investigacion y tambe identifica normanan di implementacion pa loke ta trata seguridad, salud y naturalesa.
Pa crea un sector di desperdicio fuerte, e instrumentonan y mecanismonan financiero corecto lo mester ta na luga pa asina stimula y facilita e transicion di un economia linear pa un economia circular.
E structura di sistema di desperdicio di Aruba lo ser rediseña for di un perspectiva di cadena di balor basa riba ciencia, dato y investigacion y tambe envolvimento di sector priva. Aruba su sistema di desperdicio tin hopi necesidad di reorganisacion y regulacion. E documento ta indica cu un “afvalautoriteit” (autoridad di desperdicio) ta faltando pa decadanan pa maneha y vigila esaki debidamente.
Pa por yega na un plan di restructuracion (politica di maneho di desperdicio), e prome paso ta pa laga realisa un estudio di evaluacion circular pa delinea e procesonan dentro di e cadena di balor basa riba datonan confiabel y completo.
