Secretario di Estado Alexandra van Huffelen: “E idea ta cu nos ta bay traha riba esey hunto, pero… “Por supuesto e consecuencianan financiero directo ta responsabilidad di e islanan”

Recientemente a tuma luga e reunionnan entre e Prome Ministernan di Sint Maarten, Corsou, Aruba y Secretario di Estado, Alexandra van Huffelen, caminda a dialoga ariba e deficit democratico y na unda e Prome Minister di e islanan a presenta un alternativa pa COHO.

Ayera tardi durante un conferencia virtual desde Sint Maarten, e funcionarionan a anuncia cu e paisnan a yega na un acuerdo y COHO lo wordo introduci mas. Na su luga ta bin un ‘onderlinge regeling.

Durante e conferencia aki tambe media di comunicacion tabatin e oportunidad pa manda nan preguntanan. Un medio di comunicacion local a manda un pregunta dirigi na Secretario di Estado van Huffelen, caminda ta puntra con Hulanda por yuda e Gobierno di Aruba duna e grandinan un alivio financiero.

Secretario di Estado van Huffelen a splica den su contesta cu e meta tras di e acuerdonan cu nan a haci ta pa mehora e bida di tur persona cu ta biba na e islanan den Caribe. El a remarca cu nan ta papia di resiliencia y sostenibilidad di e islanan pa sigura cu e economianan ta crece y tambe cu nan ta traha riba mehoracion di cuido medico y enseñansa y tur e topiconan aki, pero e idea ta pa nan traha hunto.

“E idea ta cu nos ta bay traha riba esey hunto, pero por supuesto e consecuencianan financiero directo ta responsabilidad di e islanan, pero e base di loke nos ta apuntando na dje ta pa traha hunto pa mehora e calidad di bida di tur hende y esaki ta un meta cu ami mes ta hopi comprometi cune, cu Hulanda ta comprometi cune pasobra realmente nos ta kere cu hunto nos por ta mas fuerte den e aspectonan aki,” Van Huffelen a enfatisa.

Prome Minister di Aruba, Evelyn Wever-Croes a agrega na esaki cu na Aruba e grandinan tin un enfoke special di atencion y el a recorda cu recientemente, dia 1 di januari, Aruba a introduci algun medida cu ta alivia e peso cu e grandinan ta experiencia, referiendo na e reforma fiscal y introduccion di Plan di Impuesto 2023.

“Nos a reduci e peso di impuesto pa e pensionadonan. Pa parehanan cu ta casa cu ta ricibi pensioen e peso di impuesto a wordo reduci tambe, nos a aumenta e reparatietoeslag pa e pensionadonan y e pensioen di biehes tambe a conoce un aumento,” el a subraya.

Gabinete Wever-Croes a agrega cu como Gobierno di Aruba nan ta consciente cu e costo di bida ta creciendo na Aruba y cu esaki ta un area di preocupacion pa e gobierno y cu nan ta “trahando riba dje.”