Mientras cu Aruba ta prepara pa eleccion despues di renuncia di Gabinete Wever-Croes II, wowo di Hulanda tambe ta riba e parti Caribense di Reino, unda Secretario di Estado pa Relacionnan di Reino y Digitalisacion, Zsolt Szabó a reacciona riba e noticia.
Den un comentario na portal online NoticiaCla ayera diamars, e Secretario di Estado a indica cu “ta lamentable cu gobierno di Aruba a cay.” Alabes, el a expresa su preocupacion pa un posible impacto riba e reformanan y otro acuerdonan cu tin entre Aruba y Hulanda, y si caida di gobierno lo conduci cu e progreso riba esaki lo atrasa of hasta stop. “Na bienestar di e hendenan eynan, mi ta spera cu esaki no conduci na stagnacion innecesario di entre otro e reformanan y e otro topiconan cu nos ta trahando riba dje hunto,” e Secretario di Estado a bisa na NoticiaCla den un declaracion cortico.
Manera Secretario di Estado Szabó a expresa despues di su bishita na Aruba luna pasa, maske e tin pasenshi, e ta enfoca riba resultado. E tempo aya, el a menciona na NoticiaCla cu su enfoke ta riba bon maneho y politica financiero, cual e ta considera dos condicion, y e di tres ta autosuficiencia – den e sentido di desaroyo economico, pasobra e hecho cu alrededor di 80% di Aruba ta depende di turismo ta haci nos isla vulnerable. El a menciona cu tin diferente industria cu por desaroya y tambe por avansa den digitalisacion, por ehemplo Call Centernan. El a destaca cu e kier crea oportunidadnan hunto.
Contestando tocante su tolerancia pa cu Aruba, Zsabo a bisa cu e ta considera su mes personable, dus e ta hopi tolerante. Pero na mes momento, e ta orienta riba resultado, y cu e kier pa ora cu yega na acuerdo, cu ambos banda ta cumpli cu esakinan. “Mi tin suficiente pasenshi, pero tambe mi kier resultado,” el a expresa. El a bisa cu e kier mira bon ehecucion y implementacion, e kier pa consolidacion di e acuerdo y ideanan cu ta trece dilanti.
