Ayera tardi a tuma luga un celebracion di conmemoración di 105 aña di Seccion Cuido Salud Hubenil (Jeugdgezongheidzorg) di Departamento di Salud Publico. Minister di Salud Publico, Dangui Oduber, tabata presente na e celebracion aki y a splica un poco ariba e presentacion cu a wordo duna y e trabou di e seccion aki.
Minister Oduber a splica cu jeugdgezondheidzorg (JGZ) ta un seccion den departamento Directie Volksgezondheid y durante nan celebracion e team di JGZ a haci un presentacion di tur nan trabou pa asina informa tur presente con importante nan trabou ta den cuadro di desaroyo di mucha y hoben.
E seccion aki ta percura pa e salud y bienestar di e muchanan, no solamente e salud fisico si no tambe salud emocional, cual ta hopi importante, y salud social di nos muchanan segun minister a remarca. El a sigui splica cu e ekipo di JGZ ta bishita scolnan regularmente y asina nan por identifica casonan cu ta trata di violencia domestico of maltrato di mucha, nan por identifica esaki trempan y p’esey nan tarea ta asina importante.
“Nan tarea ta suministra vacuna na e muchanan, nan ta duna informacion na e muchanan riba un bida saludabel y pa participa activamente den movecion. Kiermen nan ta un seccion hopi importante pa e desaroyo di tur nos muchanan, di 0 te cu 19 aña”, minister a subraya.
El a señala cu den nan vision, JGZ kier percura pa inverti mas den prevencion, deteccion trempan y p’esey nan ta pidi cooperacion di Ministerio. El a enfatisa cu e plan di maneho y vision di su ministerio pa e proximo cuater añanan ta dirigi hustamente den prevencion den salud. El a recorda cu nan a lansa un plan nacional di prevencion cu nan ta ehecutando
Minister Oduber a remarca cu algo cu a sobresali durante e presentacion ta cu na bishita di e scolnan y e datonan cu JGZ ta dispone di dje, tur e muchanan cu ta bay scol basico entre 5de y 6de klas, 45% di nan tin sobrepeso, tin problema cu obesidad. “P’esey nos como ministerio ta bay cuminsa cu un clinica pa atende e personanan cu tin problema cu obesidad”, el a indica.
“Nos ta contento cu nos por tabata t’ey presente awe tardi pa presencia e presentacion amplio cu a wordo duna. Nos kier a felicita JGZ cu nan 105 aniversario y gradici nan pa tur e trabounan cu nan ta haci cu hopi pasion pa yuda y guia nos muchanan”, el a finalisa.
