Diamars ex presidente di Chile Sebastian Piñera a oficialisa su candidatura pa competi den proximo eleccion presidencial. Piñera ta lidera cifranan den encuesta, a pesar di cu tin hopi denuncia contra dje, tocante iregularidadnan den su negoshi durante su gobierno.
Piñera ta doño di un di mas grandi fortuna na Chile. El a anuncia su candidatura den un acto masal na un area recreativo di capital di Chile. Durante e acto aki ex presidente Piñera a critica e rumbo cu Chile a tuma y tambe e poco crecemento di e productor di mas grandi di koper, den e ultimo añanan.
“Awe mi ta anuncia mi decision di pone mi nomber riba presidencia di Chile di nobo (…) pasobra e situacion cu Chile ta bibando awor ta hopi dificil y e proceso di eleccion cu ta biniendo tin un importancia grandi pa henter pueblo Chileno. Mi ta pensa cu ta mi deber pa asumi e liderazgo y e desafio”, Piñera a declara dilanti di centenar di participante.
Ex gobernante a bisa den ultimo lunanan cu e lo dicidi su participacion den carera pa un periodo nobo na presidencia di Chile, na luna di maart . E biaha aki ta su di tres candidatura presidencial despues di un cu el a perde na aña 2005, ora cu tabata competi hunto Michelle Bachelet, candidato socialista y awor presidente. Na aña 2009 Piñera a participa tambe y a gana e presidencia, birando asina e prome presidente di derecho despues di fin di dictadura di Augusto Pinochet (1973-1990).
E encuesta ta posiciona Piñera como e miho opcion pa e proceso di eleccion di proximo 19 di november, cu un apoyo di 25%.
“E unico rason cu mi a dicidi pa postula mi mes pa presidencia, ta pasobra mi kier duna Chile e miho di mi mes”, Piñera a bisa.
Despues di lansamento di su candidatura, Piñera lo ta nombra como candidato oficial di partido di oposicion Renobacion Nacional, na fin di siman proximo. Piñera lo competi cu dos candidato mas for di bloki di oposicion den un proceso di eleccion primario, pero unda e tin bentaha caba.
