Screening di gobierno no ta determinante

Redaccion di Bon Dia Aruba a tuma nota di e anuncio haci pa ministro encarga cu Infrastructura, Desaroyo Teritorial y Medio Ambiente, den cual el a anuncia cu e compania Three Rivers Real Estate N.V. lo a pasa cu exito e screening encarga pa gobierno na Servicio di Inteligencia di Aruba (Veligheidsdienst Aruba; VDA). Esey ta positivo, tumando como punto di salida cu e servicio concerni a haci su trabao debidamente.

Sin embargo, esaki no ta henter e proceso di escrutinio den cual e compania, y su eventual partnernan envolvi den provee e capital necesario, mester pasa. Den un entrevista teni ayera cu un funcionario halto di un banco comercial, a repasa e proceso cu e banconan comercial mester haci pa evalua si e recursonan financiero cu mester yega di exterior y cu necesariamente mester bay riba un cuenta na un banco comercial, ta di origen sigur y cu e banco en cuestion por dicidi positivamente riba yegada di e placa bao su custodia.

Prome aspecto di importancia: e screening cu gobierno a encarga na VDA, no tin nada di haci cu e ‘costumer due diligence’ cu e banco comercial, cualkier cu ta, mester haci bao di e stipulacionnan di e Ordenanza Nacional encuanto regla pa Prevencion y Combatimento di Labamento di Placa y Financiamento di Terorismo (AB 2011 no.28 ).

Bao di e ley aki, na vigor desde 2011, e banconan comercial tin obligacion estricto pa screen y evalua eventual cliente, pa yega na conoce e “Ultimate Beneficial Owner” cu segun descripcion di dicho ley ta “un persona natural cu ta tene un interes di mas di 25% di e capital, of por eherce mas di 25% di e derechonan di voto den e asamblea di accionista di un cliente, of por di cualkier manera eherce control berdadero riba un tal cliente; of, cu ta beneficiario di 25% o mas di e activonan di un areglo legal, incluyendo un fundacion, y un ‘trust’, of por eherce berdadero control riba un tal areglo legal.”

Esaki ta pone un obligacion bastante grandi riba un banco, ya cu mester investiga te yega na e persona natural cu ta poseedo of beneficiario di e recursonan financiero cu, sigur den caso di inversion grandi, por resulta bastante complica. Cu e agravante cu e banco comercial no por permiti e luho di haci mita trabao. E realidad internacional ta cu e banconan intermediario (‘correspondent banks’) cu cual e banconan local tin relacion di trabao (y confiansa) y cu ta percura pa e transaccionnan den exterior tuma luga, tambe ta cay bao di supervision estricto di nan autoridadnan, di manera cu e banco local mester cumpli pa nan por cumpli. Y e medidanan pa incumplimento ta severo. Na ultimo instancia e por encera exclui un banco di transmision di placa pa otro hurisdiccion, algo cu ningun banco no kier ni pensa.

Kico anto un banco local ta haci ora ta detecta cu un cierto transaccion no ta cumpli cu e rekisitonan legal? Naturalmente mester notifica e organismo di control di transaccion inusual (‘ongebruikelijke transacties’), MOT, cu despues por dicidi di tuma paso, loke por encera paso hudicial den coordinacion cu ministerio publico.

Pero kico ta e pasonan cu e banco mes ta tuma? E banco lo dicidi, pa su mes, cu no ta conclui e transaccion, y den caso cu ta trata di placa cu mester drenta Aruba, por ehemplo pa inversion, esey no lo tuma luga. Si tur banco comercial nenga un peticion pa habri cuenta y deposita placa cu ta di origen dudoso, e placa no por yega aki pa ser uza den un proyecto.

Tin casonan conoci den pasado reciente di inversion cu no por a sigui, pasobra e banconan comercial local, cuidando nan negoshi, no kier a tuma riesgo cu placa di origen dudoso, aunke e screening prome cu esey, haci pa autoridadnan gubernamental, no a duna obhecion pa loke tabata e compania mes.

Den e caso actual, unda e compania local Three Rivers Real Estate NV a presenta un compania na Inglatera como e proveedor di e capital, yama Connected Capital, cu segun investigacion di Bon Dia Aruba a resulta di ta un compania chikito sin ‘asset’ propio, pero cu posiblemente ta e ‘front’, e “shell bank” di cual e ley menciona ta papia, pa e personanan, legal o natural, cu ta su tras y cu ta provee e capital. En todo caso, e ‘due diligence; cu un banco mester haci, lo yega te alcansa e eventual personanan aki y conclui cu nan ta of no ta, di bon reputacion. Tanten cu tur esey no sosode, un proyecto no por ta sigur di su financiamento.