Diasabra Prinses Amalia Basisschool a celebra dos aña cu nan hardin di alimentacion. Prinses Amalia ta e prome scol na Aruba cu a implementa e hardin di alimentacion na nan scol y a sirbi como e proyecto piloto pa e proyecto di gobierno di Agroforesteria Sintropico.
Desde luna di januari e scolnan cu a registra, for di november ultimo, pa participa den e proyecto di Agroforesteria Sintropico a cuminsa cu e proceso di plantacion pa nan hardin di alimentacion. Un total di 13 scol a keda selecciona pa participa den e proyecto aki.
Cu e proyecto aki e scolnan cu ta participa ta ricibi sosten tanto for di Santa Rosa Aruba y Living Soil, como tambe for di Gobierno di Aruba pa desaroya un hardin cu ta provee alimentacion y asina inculca e balor pa agricultura den e futuro generacion pa medio di tecnicanan sostenibel.
Ya caba varios di e scolnan cu a planta nan hardin ta mirando nan cosecha. A traves di diferente publicacion ariba nan pagina di Facebook Living Soil Aruba ta comparti imagennan di e cosecha na e diferente scolnan aki.
Algun dia atras Mon Plaisir Basisschool a cosecha un cantidad di concomber chikito, patia y concomber normal cu a crece den nan hardin. Scol Primario Kudawecha y Scol Basico Washington tambe ta cosechando nan fruta y berdura.
Un luna pasa St. Paulus School a ricibi su hardin di alimentacion y ya caba por mira avancenan significativo. Ariba nan pagina di Facebook nan a comparti un actualisacion ariba e estado di nan matanan y con e proceso di colecta awa ta cana.
“Awe ta net 1 luna despues di a planta nos hofi. Mayoria di e matanan ta alegre y contento. E proceso di colecta awa di airco tambe ta cana basta bon y tur dia nos ta colecta por lo menos 40 galon di awa. Poco poco e muchanan ta bira mas consciente pa muha e matanan y siña na mesun momento di e crecemento di mata,” e publicacion a indica.
Ainda falta algun scol mas pa ricibi nan hardin di alimentacion y asina pronto e proyecto lo yega su fin. E meta di e proyecto aki ta pa promove practicanan agricola duradero y enfatisa e importancia di siguridad di alimentacion bou di e siguiente generacion.
