ORANJESTAD – E prome resultadonan di examen pa locual ta Abraham de Veer College (MAVO) y Colegio Arubano San Nicolas (HAVO), ta hopi abao e aña aki. Pa medio di un relato di prensa, Dienst Publike Scholen (DPS) ta laga sa cu ambos scol ta desapunta cu e resultado y ta indica cu e cantidad lo por subi despues di herexamen cu ta bin.

Bon Dia Aruba a tuma nota cu prome resultadonan di graduadonan di aña pasa na Abraham de Veer College tabata 46%, y despues esaki a subi na 55%.
Esaki a baha aki pa locual ta e eerste tijdvak na 39%. Colegio Arubano San Nicolas tabata na 62% aña pasa anto e aña aki esaki a baha te na 31%. Nos a purba haya un reaccion for di ambos scol pero nan a referi nos na Dienst Publieke Scholen pasobra no por duna declaracion na prensa. DPS como departamento encarga cu scolnan publico na Aruba a duna nos e siguiente informacion.

Desapunta cu resultado
Segun DPS, ambos scol ta di opinion cu e resultadonan aki ta un desapunto. Abraham de Veer tin como meta pa tur aña escolar por lo menos 70% di e candidatonan cu ta haci nan examen final logra esaki cu exito. DPS: “E motibonan pa e cifranan abao aki no ta facil pa indica. Un combinacion di diferente factornan tin influencia riba e cifranan aki.” E factornan aki tin di haber cu e alumno, pero tambe cu e scol, segun DPS. Ademas, pa cada scol esaki ta diferente. E scolnan ta reuni den su seno despues di resultadonan di examen cada biaha pa pone echonan den cuadro y yega na un plan di contingencia pa haci tur loke ta necesario pa alumnonan tin miho resultado den proximo aña escolar. DPS ta enfatisa cu esaki no ta conta solamente pa Abraham de Veer den e caso aki, pero tambe pa Colegio San Nicolas.

Abraham de Veer
E departamento ta sigui bisa cu na Abraham de Veer tur aña e directiva ta haci un pronostico estricto di e resultadonan di examen, segun e resultadonan di e schoolexamens (SE). Dos aña pasa e pronostico aki tabata 36% y despues di herexamen el a subi pa 50%. Aña pasa Abraham de Veer a pronostica cu 28% di e candidatonan cu ta haci nan examen final lo logra esaki cu exito. Pero despues di e di dos tijdvak e cantidad aki a subi na 55%. Segun DPS, e pronostico pa e aña escolar aki tabata inicialmente 36% pero a resulta di ta 39%. Atrobe e departamento ta indica cu esaki lo subi despues cu e resultadonan di e tweede tijdvak ta conoci, pero no ta duna un splicacion di kico ta indica esaki.

Colegio Arubano San Nicolas
E meta pa Colegio Arubano San Nicolas segun DPS tabata pa nan pasa 70% e aña escolar aki, stipula a base di cantidad cu a gradua aña pasa cu tabata 68%. Sin embargo, a base di e cifranan di e aña aki despues di eerste tijdvak, a adapta e meta aki. Directiva di Colegio San Nicolas ta premira cu despues di herexamen e cantidad lo ta riba di 40%. Den aña escolar 2014/2015 e porcentahe di graduadonan tabata 28%, mientras cu e aña anterior esey tabata aproximadamente 70% segun DPS.

Scoge pakete pisa
Un factor cu por hunga un rol den e resultadonan di examen ta, segun directiva di Abraham de Veer, e echo cu mayoria di e alumnonan ta scoge e pakete di materianan cu ta mas pisa, esta ‘Natuurwetenschappen’. Un total di 60% di e alumnonan tin e vakkenpakket aki.