Muchanan di edad escolar na Saba ta ricibiendo un cuminda saludabel, gratis tur dia na scol, paga pa ministerio di Asunto Social y Labor (SZW) pa yuda famianan cu e aumento den costo di bida.
Na october di aña pasa, minister di Politica di Pobtresa, Participacion y Pensioen, Carola Schouten a informa Tweede Kamer di Parlamento Hulandes cu e tabata kier a duna impulso na e provision di cuminda gratis na scol den Hulanda Caribense.
E minister a nota cu e impulso aki, den anticipacion di medidanan cu a drenta na vigor dia 1 di januari ultimo, pa mehora poder di compra di pueblo, tabata deseable den e temponan excepcional aki unda mas y mas famia cu mucha ta luchando pa pone pan riba mesa.
Entidad Publico Saba ta tin un rol activo den iniciativanan priva y publico pa provee cuminda saludable.
Minister Schouten a entrega Entidad Publico Saba un pago special pa duna cuminda gratis na scol. E scol Sagrado Curason (SHS) y Scol Comprensivo Saba (SCS) a wordo informa di e decision di e minister y a pidi nan pa entrega un solicitud formal pa asistencia cu un programa di desayuno gratis.
Conseho Ehecutivo recientemente a aproba un propuesta pa haci un pago na e dos scol pa nan programa di desayuno. E cuminda na scol specialmente tin un impacto positivo riba muchanan cu no ta haya un desayuno adecua prome cu bay scol.
A pidi e scolnan pa coopera cu Departamento di Salubridad Publico di Saba pa sigura cu e desayunonan ta saludable y nutritivo.
