Den un conferencia di prensa, ayera mainta e compania di telecomunicacion local Setar N.V conhuntamente cu Stichting Katholiek Onderwijs (SKOA) y minister di Comunicacion, Economia y Desaroyo Sostenibel, Geoffrey Wever a anuncia cu nan ta bay instala fibra optica den scolnan di SKOA.

Roland Croes director di Setar N.V a señala cu ayera tabata un dia special y interesante unda el a indica cu pa algun tempo nan ta bezig instalando fibra optica na tur cas rond Aruba.

E intencion tras di esaki ta pa tur cliente di nan por haya un speed mas halto pa loke ta trata internet. Den esaki tambe nan ta bin check kico ta e contribucion cu nan por haci pa comunidad di Aruba. “Nos ta kere cu un di e cosnan mas importante cu nos por haci cu den un termino corto nos por contribui na e desaroyo di loke ta enseñansa”, Croes a bisa.

Manera el a indica, enseñansa ta algo hopi importante pa comunidad e ta crea hendenan critico, cu ta compronde y cu ta traha hunto pa un pais, esey ta importante pa tin.

“Nos ta kere cu contribuyendo cu esey nos lo por cu berdaderamente como Setar N.V, yuda e desaroyo di Aruba den diferente cos cu nos ta haci y esaki sigur cu lo ta hopi importante pa Aruba mes”, el a indica.

Ta p’esey cu nan a acerca diferente stakeholders y organisacionnan pa motibo cu enseñansa na Aruba ta reparti den e fundacion y esun prome cu a firma ayera tabata SKOA pero tin mas na caminda unda el a declara cu pa otro siman nan ta bay firma cu otro instancia y otronan cu a firma caba como Colegio Arubano, Universidad di Aruba, entre otro.

Croes a bisa cu no solamente nan a acerca SKOA pa pone fibra optica sino tambe nan a acerca otro instancianan debi cu nan kier bay na e siguiente nivel, scolnan ta bay tin mas cu fibra optica, tambe nan ta bay haya e servicio mas ultimo di Setar N.V den un prijs mas accesibel y pa tambe tin contacto cu tur scolnan via e mesun red “nos a crea un netwerk cu tur scol ta bay haya un extension y tur ta conecta cu SKOA su main office, cu den tur parti nan por comunica no solamente cu internet y cu tecnologia mas moderno.

Cu esaki, aproximadamente 10 mil studiante y 700 empleado di SKOA di scolnan ta bay wordo beneficia unda cu pa loke ta trata inversion Croes no a duna mucho detaye pero si a bisa cu akinan ta wordo papia di un inversion di cientos di miles di florin.

Ayera nan a firma e contract cu SKOA loke ta nifica cu den un solo biaha den dianan cu ta bin nan ta bay na 17 scol pa cuminsa cu instalacion di fibra optica, hoofdkantoor di SKOA a wordo agrega caba unda nan administra tur e parti di IT y tambe algun kleuter, manera Croes a sigura.

Anuesca Baly director di SKOA a declara cu nan no a perde gana ora cu Setar N.V a acerca nan pa e oportunidad aki cu na e momentonan aki nan ta bay cuminsa implementa fibra optica na 17 scol pero ainda falta pa motibo cu nan tin den total 46 scol na diferente districto.

“Cuminsando cu e 17 sol y pa otro aña tur lo a wordo acapara cu fibra optica, esey kiermen cu mas miho calidad pa bo por traha e digitalisacion den e klasnan, nos ta sumamente contento y sigur tambe cu kantoor di SKOA pasobra cada biaha pa nos ta haya e ta fastioso pa nos por comunica cu scolnan y e ora ey nos por bay over na e parti di PBX Box caminda cu nos por tin mas contacto cu nos scolnan y primordialmente tambe pa baha gasto, pa asina ey tin nos scolnan mas miho informa”, Baly a comenta.

Esaki tambe ta nifica cu nan tambe como SKOA ta preparando pa sigui den futuro pa cu e muchanan y docentenan pa loke ta e parti di digitalisacion y tambe cu internet mas lihe.

Di su parti, minister Wever a trece dilanti cu esaki tabata un bunita momento pa wak cu Setar N.V cu ta un empresa estatal y cu ta contribuyendo pa e digitalisacion di Aruba ta participa den esaki y a scoge un fundacion cu ta traha cu scolnan y cu enseñansa cu ta asina importante como e prome cu ta participa pa haya acceso na un miho y mas halto speed di internet.

“Mi ta kere cu e ta algo hopi positivo y mi ta contento cu esey, gradiciendo Setar N.V, gerencia y empleadonan pa e supervision y trabounan duro pa por a yega akinan y tambe pa SKOA pa kier ta parti di e programa aki hunto cu Setar N.V, e ta un contribucion positivo y cu un compania estatal ta inverti den nos sociedad y nos pais, cuminsando cu enseñansa”, minister Wever a expresa.