Ayera tabata e dia unda scolnan rond di Aruba a duna un caluroso bonbini na un aña escolar nobo y tambe studiantenan yen di entusiasmo a cuminsa yega trempan pa haci nan best den caminda aki cu pa algun di nan tabata e prome biaha. Pa esaki Minister di Enseñansa Endy Croes a duna un conferencia di prensa na Scol Soeur Juliette.

Pa duna un palabra di pabien y di exito na tur studiante y juffrouwnan, ayera Minister Croes a acerca na Scol Soeur Juliette pa igualmente introduci e cabesante di scol nobo Natalie Chong. Den esaki tambe a keda inaugura e proyecto di airco na tur lokaal cu oficialmente a keda cla.

Anteriormente conoci como Emma School, e scol aki a cuminsa na 1954, kiermen 69 aña pasa na su localidad anterior y na 2001 a muda na un edificio na Ayo na unda minister Croes a sigura cu hopi reto a keda na caminda di nan tabata un buraco cu tabatin patras di scol e cual a keda cera un aña atras pero e deseo tabata pa por tin un airco na tur e lokaal di e scol.

Cambio Climatico ta causando hopi desaroyo pa loke ta trata e clima lo cual ta trece cune hopi calor. Specialmente na Aruba cu ta un isla, hopi scol a bay den fase pa pone airco y mientras tanto e scol no a logra esey den transcurso di e añanan cu a pasa.

Tabata juni di aña pasa unda cu Minister Croes hunto cu Prome Minister Evelyn Wever-Croes a priminti cu lo traha pa por aloca e airconan den scol aki pa loke el a sigura cu “no tabata un trabou facil; mester a traha diferente rapport, contrata companianan y banda di esey, ELMAR tambe mester a duna di su parti pa aumenta e capacidad y por carga e proyecto aki, awe hopi contento nos a ricibi e bon noticia cu tur e airco a start,” el a bisa.

Tabata un total di 38 airco loke a keda instala den e lokaalnan di e scol aki cu tabatin solamente airco den e oficinanan y den esaki, Minister a gradici e ex-cabesante juffrouw Joyceline cu tabata un persona clave den proyecto aki.

Minister Croes tambe a informa cu esaki no ta e unico scol cu tin un proyecto di airco sino cu tambe na Paradera tabatin un otro scol di DPS cu e mesun problema aki, scol Caquetio tambe ta den plannan y segun el a sigura, casi 95% di scol tin airco caba y esnan cu ta falta nan ta bay percura pa por finalisa esey den aña escolar aki.

Di su parti, Natalie Chong cu for di awor ta fungi como cabesante di scol a duna palabranan di gradicimento na minister Croes pa cu e proyecto aki y tambe a expresa cu “awendia airco no ta un luho pero mas tanto un necesidad y aworaki nos muchanan por disfruta di un di un les na un lokaal cu un clima agradabel pa asina nan por concentra y funciona optimal, full ekipo di scol Soeur Juliette ta hopi contento cu e proyecto di airco a logra finalisa prome cu aña escolar a cuminsa,” el a sigura.