(Infobae) – Ministerio di Educacion a haci e anuncio pa scolnan di Guayaquil, Duran, Samborondon y Esmeraldas. E medida lo permanece te ora cu yega condicionnan adecua pa e studiantenan por bolbe back scol.
Ante e hechonan violento y atentadonan cu a bolbe surgi na Ecuador, e Ministerio di Educacion a ordena e suspencion di lesnan presencial na institucionnan educativo di Guayaquil, Duran, Samborondon y Esmeraldas. E suspencion a inicia diaranson y lo extende te ora cu e condicionnan mehora y yega na un nivel adecua pa por bolbe back scol.
Via di comunicacionnan oficial, e cartera di estado a informa cu e “lesnan lo ser recupera conforme e programa cu e Autoridad Educativa Nacional emiti.” E meta di e suspencion aki ta pa tuma precaucion y proteha e siguridad di e menornan. “Nos lo mantene den sesion permanente na e mesanan di siguridad, evaluando e situacion cu e organismonan di control, cu e meta di informa di manera adecua nos comunidad educativo di desaroyonan,” e entidad a señala.
Prome cu e anuncio, e alcalde di Guayaquil, Cynthia Viteri, a skirbi un publicacion unda el a pidi president Guillermo Lasso pa suspende lesnan presencial “na e ciudad di Guayaquil y na e sitionan di conflicto mientras cu ta tuma e medidanan severo cu tur hende ta spera.” Di mesun manera, el a pidi e reduccion di e orarionan laboral, cu e proposito pa tur hende cu ta traha por bolbe back cas trempan.
Desde marduga riba diamars e violencia no ta para na Ecuador. Den dos dia, un serie di atentado a ser registra cu 7 auto cu bomb, mas di 10 descubrimento di material explosivo y un explosion na Municipio de Duran, entre otro. Como resultado di esaki, tin 5 miembro di cuerpo policial asesina y autoridadnan a detene 28 sospechoso.
