Ayera diabierna tabata un dia hopi leuk yen di alegria y di hopi creatividad na Scol Preparatorio Cayena unda nan a wordo celebra e Dia Internacional di Derechonan di Mucha cu un exposicion di trabounan di nan studiantenan enfoca riba e tema di reciclahe.
Juffrouw Lucita Regales ken ta fungi como cabesante di scol aki ubica na Noord a señala na reportero di Bon Dia Aruba cu nan a haci e actividad aki pa asina ey por involucra un tiki mas e mayornan na scol, pa nan bira mas activo cu nan yiu, pa yuda traha mas cosnan asina aki manera ta e tema di reciclahe cu awor nan ta bezig cune.
Cu esaki, nan kier pa mayor y nan yiu traha hunto cu material di reciclahe cu den dianan aki den cual nan a haya sa kico e tema aki kiermen y pa no tira nan den sushi, pa traha hopi cosnan leuk como coy di hunga, “e intencion di esaki tabata pa traha un wega, pa por usel’e, pero tin di nan a traha wega cu material di reciclahe y otronan a traha otro material, e meta di esaki tambe ta pa mayornan desaroya e parti social di traha cu nan yiu, nan ta intercambia e weganan pa por hunga cu e mayornan a traha hunto cu nan yiu”, juffrouw a señala.
Esaki tambe ta forma parti di e metanan di parti cognitivo, e parti di fantasia “cu nos a wak waw! Hopi cos tremendo cu mayornan por a saca y cu nan tin hopi potencial di traha y nos lo kier keda mantene esaki, pa otro aña nos lo kier haci’e mas grandi cu otro scolnan pa wak kico tur tin den casnan, tin hopi material cu no por benta afo, cu bo por haci uso di dje y traha esey cu bo yiu, esey ta e meta”, el a sigura.
Tocante e dia special aki di Derechonan di Mucha nan mes como docentenan a sigura cu nan mes por logra haci e actividad aki y nan a bay pe, caminda cada mayornan tin su potencial y cada mucha tin su potencial, “dus a base di esey, nos a bisa ban haciel’e y pa asina toch nos por haya mayornan na scol tambe, e colaboracion hunto ta bira mas grandi”, juffrouw a indica.
Ayera mainta muchanan di Scol Primario Cayena a habri e dia aki cu oracion, despues nan a canta y nan a bay celebra nan dia, “nan a pasa di klas pa klas pa hunga cu tur e material, nan a haya nan treat cu boli, nan a enjoy nan dia”.
Asina mes, el a declara cu nan kier sigui haci actividad di e forma aki debi cu nan kier haya mas mayornan envolvi cu scol di nan yiu, cu tur e tareanan cu nan tin cu tambe ta yuda mehora comportacion debi cu nan ta presentando problemanan cu muchanan cu ‘ker’ y p’esey nan kier haci mas actividad pa cu esaki tambe.
Juffrouw a gradici esfuerso y sosten di mayornan cu a haci posibel e proyecto di exposicion di reciclahe pa e muchanan unda nan a pasa un dia leuk y nan a siña hopi.
