Scol Pius X ta mira pronto solucion despues di bishita di minister y DOW

Ayera mainta minister di Enseñansa, Michelle Hooyboer-Winklaar  a realisa un bishita di trabou na scol Pius X pa scucha di cerca e motibo cu nan docentenan a dicidi di bay den accion dialuna ultimo. Y awor ta mira un solucion na cerca.

Nan a haci inspeccion y e minister tambe por a evalua cu e situacion ta uno alarmante.

“Nos ta contento, uno cu e minister a yega y ayera nos tabatin e directora di SKOA tambe cu a bini mira e situacion. Y DOW a bin awe cu su expertonan. Esaki ta un muestra cu nos ta bay riba e bon caminda y lo bay tin un solucion pronto”, Henry Barrera ta bisa. E docente aki ta actua como vocero di e docentenan cu a bay den accion.

E ta lamenta cu despues di e reunion cu nan a sostene cu e mandatario, nan a ripara cu cierto cosnan no ta yega cerca dje. “Aworaki el a yega straight na minister di Enseñansa y no a bay via via. Ora e ta bay via via e respondi no ta yega mester ta.” E accion a para practicamente, aunke mirando e situacion actual cu personal di DOW a cuminsa traha riba e bentananan,  e muchanan lo wordo acomoda di tal manera cu nan por haya les. Nan tabata atendiendo e logistico con nan lo por sigui pa yuda e muchanan pa e dianan cu ta falta prome cu vakantie grandi. E parti di dunamento di les nan no ta haya cu ta un problema ya cu na altura di e aña academico aki na porta pa caba, ya practicamente 98% di e lesnan a wordo duna, segun meneer Barrera. “Esey no ta bira un peliger pa e mucha su parti di educacion.”

Minister: SKOA tin e fondonan
Sr. Barrera a bisa cu despues di sostene un reunion cu e mandatario, el a puntra nan riba un posibel solucion pa bin cu ne riba mesa. Di parti di e docentenan nan ta kere cu e opcion mas rapido pa yega na airco (cu ta e solucion ideal) ta e sistema di lease cerca un compania.

Tambe entre e docentenan  mes cu e cabesante di scol, nan a reuni pa traha un carta pa e mandatario cu e posibilidad di algun quotation di companianan di airco  interesa. Nan a keda di manda e carta aki eventualmente den oranan di merdia pa asina e mandatario na su turno evalua e forma con lo yega na e fondonan necesario y trece dilanti kico ta e miho solucion.

Di otro banda, e docentenan ta compronde cu SKOA ta haya cierto fondo pa atende cu drechamento di infrastructura di scolnan, sinembargo tin scolnan cu no ta wordo beneficia cu e placa aki. Esaki ta algo cu nan tin cu mira cu otro pa wak con nan por yega na un solucion pronto pa garantisa e calidad di enseñansa di e muchanan. Ayera SKOA mes a bisa cu nan a atende gobierno riba e problemanan y cu no tin fondo. Sinembargo minister di Enseñansa a manda un relato unda ta bisa cu SKOA ta haya mas cu 1 miyon florin na subsidio pa mantencion di nan scolnan. Minister Hooyboer-Winklaar ta enfatisa cu p’esey nan ta pidi transparencia di SKOA pa basta tempo caba pa wak kico nan ta haci cu e fondonan.

“Ta di lamenta cu na luga di atende cu nan y soluciona esaki, SKOA no ta pasa e fondonan pa e scol mes drecha nan fayonan, ni tampoco ta busca hende pa drech’e, sino ta prefera laga e trabou chikito bira grandi pa despues bisa: ta responsabilidad di gobierno”, asina e minister ta declara.

Trahando riba bentananan
Bon Dia Aruba por a mira cu personal di DOW a cuminsa traha riba e bentananan. E intencion ta pa kita tur e bentananan cu ta den mal estado, ya sea kibra of cu no ta habri. Eventualmente pa inicio di e vakantie grandi nan ta cuminsa haci un trabou grandi den scol.

Igualmente den nomber di e cuerpo di docente di scol Pius X, meneer Barrera ta expresa palabra di danki na e mayornan di e muchanan pa e pasenshi.  Nan ta haya cu e mayornan tin comprension,  ya cu ta nan yiunan ta esunnan den e klasnan soportando e calor pisa. P’esey nan a para tras di e accion aki tambe. “Semper bo tin comentarionan, pero e tabata positivo. Nos a haya reaccion positivo di coleganan di otro scolnan.”

Mañan Bon Dia Aruba lo bin cu un declaracion di e cabesante di scol Pius X riba e trabou cu lo tuma luga y con nan mes lo ton pensa di organisa nan mes.

Mas informacion for di banda di minister
Den su relato e minister ta splica mas over di e situacion di scolnan y Pius X. “Nos tin 83 scol y tin varios scol cu tin e necesidad di renobacion completo. Nos ta papia di scolnan cu ta existi pa 40, 50 y 60 aña y nan ta riba un lista di espera pa por haya fondonan pa renobacion completo”, asina minister Hooyboer-Winklaar ta duna di conoce.

Puis X ta cay den e categoria cu a ricibi diferente trabou (incluso recientemente di un cura nobo cu a costa alrededor di Afl. 300,000) pero pa motibo di falta di mantencion a pone varios problema acumula, segun e minister. “Kisas algun aña pasa a cuminsa mira problema cu 1 bentana y par di luna despues otro bentananan a haya problema. Mirando cu no tabatin un plan of intento pa atende cu e problema di biaha via mantencion, a haci cu e fayonan a acumula. Esaki a pone cu awo practicamente casi niun bentana ta habri y minister di Enseñansa ta haya cu e situacion aki ta uno hopi di lamenta”, asina ta lesa den e relato.

Minister di Enseñansa ta mira cu “por a evita e problema aki, kisas no completamente, pero sigur cu mantencion manera stipula y conforme e subsidio cu ta aloca pa SKOA. Por a evita e problema aki si na momento a bati bel, SKOA cu tin e responsabilidad pa drecha cosnan mas chikito, a actua”.

“Ta te aña 2014 Taskforce cu ta resorta bou di DOW a cuminsa asisti scolnan di SKOA, pues prome cu esaki SKOA tabatin e tarea aki completamente den nan man”, e minister ta splica.

 Mantencion chikito ta cay bou SKOA
Den e caso di Pius X, e minister ta papia di ‘mantencion chikito’  cual ta cay pe responsabilidad di SKOA y nan ta ricibi fondo pa esaki. Y manera menciona e minister ta reserva mas cu 1 miyon den e presupuesto di SKOA pa drecha cosnan chikito, mientras gobierno ta encarga cu reparacionnan grandi.

Minister Hooyboer-Winklaar ta bisa cu el a scucha nan preocupacion y cu awo esaki a bira un reparacion grandi, pero na momento cu nan a cuminsa daña el a cay bou mantencion chikito y esaki no a tuma luga. E comunicado ta bisa cu esaki ta splica awor dicon tin varios otro scol den e mesun situacion aki, unda cu tin cosnan chikito pa drecha.

E minister tambe ta puntra su mes dicon no ta drecha e cosnan chikito na e scolnan mientrastanto SKOA, e directiva di e scolnan catolico na Aruba, tambe a aumenta pago di scol di 75 pa 175 florin pa aña. Cual ta un suma di 1,9 miyon florin.

“Si gobierno ta paga salario di tur docente na Aruba, si gobierno mester drecha scolnan cu defacto ta pertenece na SKOA, kico ta e motibo pa tin un fundacion manera SKOA anto den nos sistema di educacion?”  Esaki ta preguntanan cu minister a indica cu lo manda carta pa parlamento di Aruba pa haya nan ‘pensamento’ riba e asunto aki pa por trece ‘cambionan pa un structura cu ta funciona debidamente’.