Scol Pius X di bario di Dakota a logra e premio di brons den categoria “Top Award” di e Kids Council Award na Hulanda. Ta prome biaha cu e premio aki ta wordo organisa unda muchanan ta vota pa muchanan y scol Pius X ta hopi contento y orguyoso cu nan premio.

E cabesante di e scol, Sheila Tromp a biaha hunto cu docente Henry Barrero y dos studiante, Marcelino Alvarez y Roland Petrochi, pa bay ricibi e premio aki otorga dia 22 di juni ultimo den Concert gebouw na Amsterdam. “Pa nos e tabata algo super pa bo ta eynan presente” asina cu hopi emocion e cabesante di Pius X a bisa.

E ta prome biaha den historia cu Aruba ta gana un premio di e magnitud aki. Pius X a marca historia y ta habri porta pa diferente scol por participa cu nan proyecto pa conkista e premio aki. Sra. Tromp a describi e momento inolvidabel ey: “Tur persona tabata hunto y ora bo ta sinta eynan. Nan ta cuminsa di biaha bisando: ‘Nos tin bishitantenan special for di Caribe, lanta para!’. Bo ta weita nos bandera eynan. E tabata un emocion hopi hopi grandi.”

Sra. Tromp a declara na Bon Dia Aruba cu e tabata un honor pa nan. E ta haya cu e premio brons ta un logro hopi grandi; y nan a bay asina leu mirando e cantidad di participante. Un total de 55 empresa, ministerionan, consehonan municipal y otro organisacionnan di Reino Hulandes ta participa; algun di nan ya caba tin nan Conseho di Mucha (Kinds Council).

“E ta un premio grandi pa nos scol. Mi no ta sterotipa, pero nos ta bin di un scol di bario”, el a bisa. E logro aki ta refleha cu nan tin enseñansa den nan curason. Aunke e condicion di nan scol no ta uno optimal pa nan por duna les, pero nan tin e muchanan hopi motiva y nan tin docente hopi motiva tambe.

Pius X y Divi Resort
E premio aki ta un iniciativa di princesa Laurentien kende ta casa cu prins Constantijn. E princesa a bin cu ne pa medio di su fundacion Missing Chapter Foundation (MCF). E miembro aki di e cas real Hulandes a bin cu e idea cu e muchanan tambe por yuda pensa pa busca solucion pa e compania den cuadro di sostenibilidad of durabilidad; ya cu cualkier actividad cu nos ta haci mas of menos tin su impacto den nos comunidad y nos planeta. E topiconan tin di haber cu energia sostenibel, salud, educacion of cualkier otro tema actual cu e companianan of organisacion kier mehora semper. Esaki ta un forma pa tene cuenta cu e pensamento y opinion di e muchanan, ya cu nan tin otro forma mas creativo di pensa cu lo por resulta mas util y menos complica pa atende cu topiconan asina.

Ora cu Scol Pius X a wordo invita pa participa den e actividad aki na nivel di reino Hulandes, nan a tum’e cu man habri; ya cu e ta yuda e muchanan desaroya riba otro nivel. Ya caba e muchanan di klas 6 tabatin dos aña cu tabata participa; y e biaha aki nan a haci’e hunto cu e compania hotelero Divi Resort. E docente Barrero tabata esun cu a sa di guia e klas. Nan ta un klas di 22 mucha y nan a traha diferente grupo y cada grupo a traha riba un topico specifico di e compania. Na final di nan investigacion e klas ta presenta e concepto completo.

Loke e cabesante di e scol ta mira hopi interesante di e tipo di proyecto educacional aki ta cu e compania ta trece un problema y e muchanan ta haci un investigacion y despues nan ta haci un presentacion di loke nan ta kere lo por ta un solucion. E ta gradici staff di Divi Resort cu a tuma e proyecto di scol na serio, y a brinda tur sosten y colaboracion pa e muchanan por a realisa su trabou.

Te hasta nan a organisa un dia special cu tur e managernan –entre nan Alex Nieuwmeyer CEO Divi Resorts– unda nan a bay debati hunto cu e muchanan di klas 6 riba e consehonan cu nan a trece pa nan departamentonan. “Bo ta wak cu nan a tuma e cos aki na serio!”, segun Sra. Tromp. Pero e contacto aki no a keda exclusivamente den e managernan sino cu e muchanan a trece cerca nan respective departamentonan.

E biaha aki tabatin 54 compania hunto cu nan scol cu a representanan cu a participa na e Kids Council Award; cual 44 a entrega un relato anual. Den e relato aki nan ta splica kico scol a traha of investiga riba dje y con e compania a tuma esaki. A base di e 44 relato anual nan a scoge 9 compania cu nan respective scol cu a bay final, tres den cada un categoria: Innovacion; Promocion y Top Award .

Ta asina cu pa medio di un conseho traha pa e studiantenan, e compania Divi Resort a bin cu e “We Are Divi”. Esaki a consisti di un dia multicultural cu Divi Resort a organisa pa conoce tur e personanan cu ta traha den e compania y sa mas di nan cultura, etc.. Danki na e conseho duna pa e muchanan di klas 6 di Scol Pius X, a wordo nomina na e categoria “Top Award” cu ta esun cu nan ta categorisa como e miho investigacion y trabou den ekipo entre e scol y e compania. Den esey, Scol Pius X a cay den e categoria aki hunto cu Divi Resort y na final nan a bay cu e premio di brons.