Scol no lo habri 11 di mei awor y seguramente e no lo habri mas pa loke ta resta di e aña escolar aki debi na e crisis di coronavirus/Covid-19.
“Pa resumi 11 di mei scol no ta habri,” asina minister di Enseñansa, Ciencia y Desaroyo Sostenibel, Rudy Lampe a declara ayera. El a agrega cu scol lo bay keda cera te proximo aviso.
Pues mayornan ta bay ta na cas y muchanan tambe ta bay ta na cas, el a bisa. Igualmente el a laga sa cu educacion a distancia ta bay ta parti di e normalidad nobo. Minister a bisa cu nan lo anuncia pronto con e ta bay ta structura. Pero for di awor nan kier pa tur nos maestronan y nos tur por ta prepara, ya cu e desaroyo di inteligencia digital ta bay ta fundamental den e normalidad nobo.
El a bisa cu parti di e normalidad nobo tin di haci cu e muchanan ta bay ta mas na cas y menos na scol. Y seguramente nan lo mester keda bao e guia di e mayornan, pasobra un scol importante ta bay bira bo hogar, caminda e muchanan por siña masha hopi mes di nan mayor, segun e mandatario.
