Scol lo keda cera te 11 di mei, examen ta tuma lugar na mei

Ministro di Enseñansa, Ciencia y Desaroyo Sostenible Armando Rudy Lampe a ofrece un conferencia di prensa pa anuncia cu scolnan lo keda cera te cu dia 11 di mei. Tambe el a anuncia cu examen escolar lo mester tuma lugar na luna di mei.

Minister Lampe a splica cu despues di un deliberacion cu prome ministro y algun experto, nan a tuma e decision cu no a supera e crisis ainda y no ta responsable pa habri scolnan atrobe dia 20 di april.

Tambe el a bisa cu nan ta den dialogo cu ministerio di Enseñansa di Hulanda, y aplicando e principio di concordancia den Reino, Hulanda tambe tin su scolnan cera te dia 11 mei y p’esey Aruba tambe a tuma e decision aki pa mantene e scolnan cera te e fecha ey.

Hulanda den proximo dianan lo anuncia si nan lo prolonga e periodo aki, y na Aruba lo keda pendiente pa evalua e situacion.

Minister Lampe a manifesta cu ta importante pa maestro y cabesantenan di scol keda duna educacion na distancia; tecnologia por yuda y e ta e unico alternativa na e momentonan aki pa muchanan por haya educacion.

El a enfatisa cu e cambio aki ta uno abrupto y e ta comprende esey, aunke desde 2019 a anuncia caba den e Plan di Educacion Nacional 2030, cu tin como titulo Digitalisacion den Enseñansa, cu a causa di e crisis aki mester acelera e proceso di enseñansa.

Di e dialogo cu Hulanda, el a informa cu tambe a adopta e resolucion cu e periodo di dialuna 4 di mei te cu diabierna 8 di mei examen escolar ta sigui y cu esey ta e unico excepcion cu nan ta haciendo, pa motibo cu a cancela Centraal Eindexamen di Hulanda y e diploma aworaki ta depende solamente di e promedio di examen escolar.

Pa e motibo aki, el a comenta cu ta importante cu examen escolar tuma lugar mas liher posible di un manera digital, y si esaki no ta posible mester regla esey, pa asina e alumno por bay na scol mes, siguiendo e reglanan di DVG pa proteha salud di un y tur.