Den fin di siman, Scol di Musica Rufo Wever a celebra 70 aña den educacion musical. Un bunita celebracion na unda publico presenta a gosa di un concierto di musica cu a rindi homenahe na un logro asina importante.
Stichting Arubaanse Muziekschool a wordo funda na 1953 y tin como obhetivo promove musica y tur arte relaciona en general, y brinda les den e artenan aki. dia 10 di september 1998 a cambia e nomber oficialmente pa Scol di Musica Rufo Wever y su mision ta contribui na un educacion musical optimal na Aruba.
E scol tin como vision presta atencion na e desaroyo musical di e studiantenan, tanto clasico como popular, pa asina nan por participa den eventonan social y cultural na Aruba.
Scol di Musica Rufo Wever ta duna les di musica na mucha for di 7 aña (les di musica pa kleuter ta pa un edad mas jong) te cu adulto.
Ta ofrece les den e areanan di piano, guitara clasico y electrico, baho, drums y percusion, cuarta, violin, trompet, blokfluit, canto, musica preparatorio – kleutermuziek, AMV – Algemene Muzicale Vorming (Formacion musical general), solfeo, areglo, teoria di harmonia, tocamento den grupo y curso di musica dirigi.
Hopi alumno cu a ser forma na Scol di Musica Rufo Wever o a sigui nan estudio na nivelnan mas avansa, entre otro na Hulanda den conservatorium of na universidad na Merca, despues di nan trayectoria na Aruba. Awendia hopi di nan ta maestro na Scol di Musica Rufo Wever mes y asina nan ta sigui contribui na e cultura y formacion musical di Aruba.
