Sclavitud no ta… Toca nos, awe…?

Sclavitud ta un tema cu na Aruba no a topa cu gran interes, y e debate cu ta tuma lugar den otro parti di Reino ta parce di no ta toca nos. Esey por parce asina si nos djis tuma algun aspecto na cuenta, cu ta duna e argumentonan di semper, basicamente bisando cu ‘cerca nos sclavitud no tabata gran cos’. Aki naturalmente comparando nos cu e situacion na nos hermana islanan Corsou y Bonaire, y un pais manera Suriname, conoci pa tabata un di e sistemanan di sclavitud mas brutal y cruel, tambe den comparacion cu otro pais colonizador.

Nos ta kere ta bon pa pone e argumento aki den su contexto corecto, pa den e discusion di awe nos por tuma esaki na cuenta. Si ta berdad cu e sistema di sclavitud, den su forma te na abolicion na 1863 tabata un sistema cu tabata abarca un parti chikito di e poblacion, esey no ta kita cu e tabata existi y cu na 1863 hende a haya nan libertad, loke promer cu esey nan no tabatin. Como tabata trata di un grupo relativamente chikito, den e siguiente siglo a tuma lugar un asimilacion dentro di e poblacion cu a haci cu a bira dificil pa haci un distincion claro entre descendiente di catibo, tenedor di catibo y otronan cu dentro di nan famia no tabatin arte ni parti den ningun banda. Esey a crea un situacion cu en berdad ta totalmente diferente cu e otro islanan.

Nos por saca di esaki anto e conclusion cu e ta un tema cu no ta toca nos? Esey lo ta e conclusion robez, pasobra sclavitud no ta un fenomeno cu ‘pa nos suerte’ no a laga tanto marca atras den nos comunidad, y esey pa un motibo hopi importante: sclavitud no ta un problema di pasado so, e ta un problema mundial awendia, y e ta un problema existente cerca nos tambe. Claro cu e casonan cu nos ta topa awe no ta mustra e situacion di tanto aña pasa, pasobra e cuadro legal pa sclavitud no ta existi mas. Pero esey no ta implica cu sclavitud no por tuma lugar. Es mas, a bira mas dificil pa reconoce cierto tipo di robo y limitacion di libertad, mientras rond mundo, cerca nos tambe, tin un poblacion migrante cu potencialmente ta brinda bastante oportunidad pa yega na explotacion y restriccion di libertad, cu ta acerca y den cierto caso ta iguala sclavitud, den restriccion di libertad y trabao forzoso, tambe bao circunstancia cruel y sin pago debido.

Tur esaki a duna bida na legislacion nacional y internacional contra traficacion di hende, cu ta prohibi duna hende un trato y explota nan na un manera cu ta acerca loke tabata sclavitud. Y no ta cuestion cu sclavitud den su expresion moderno ta solamente na otro lugar, pa nos ‘por drumi tranquil’, wel lanta for di soño anto pasobra e ta existi aki tambe.

Laga nos conta un storia, berdadero, di poco aña pasa. E persona cu a conta nos ta keda anonimo. Tabatin un empresa na Aruba cu tabatin un grupo di cinco persona scondi, pa nan traha den e shift di marduga den e empresa, mientras den dia nan tabatin prohibi pa sali, pa no detecta cu e empresa tabata traha cu ilegal. Nan mester a entrega nan pasaporte y no por a sali pa haci nada, ni pa cumpra algo personal. Mientras tanto e empresario a bisa nan cu e ta reglando nan estadia pero di ningun manera nan a haya un señal cu esey tabata e caso. Despues di mas di un aña un di e personanan a logra sali, y a bay busca ayudo. Pa su suerte el a topa cu hende cu a comprende e situacion, y a pesar di e menazanan di e doño di trabao cu e lo a contacta su ‘hendenan’ den gobierno pa deporta nan, a logra saca nan for di e situacion y a regla nan estadia legal. E contactonan den gobierno di e empresario a keda keto ora nan a ripara cu tabatin ambtenaar drechi cu no a hala atras pa e tipo di abuso aki. Di mes e empresario no a haya ningun problema cu autoridad, esey tabata e parti cu no por a haci nada. En todo caso, a pone un fin na e forma moderno aki di sclavitud, den e caso particular aki. Tabatin mas caso asina.

Pa ta bon cla: sclavitud den e forma mas grosero y humiliante di antaño no ta existi mas, cerca nos no, pero esey no ta implica cu den otro formanan e no ta parti di realidad di e mundo aki, y di nos tambe. E fluhonan grandi di labor forzoso a traves di sclavitud ‘legal’ a traha lugar pa ‘liber movimento di labor migrante’, cu tur e abusonan cu ta sucede eyden, tambe cerca nos.

Ademas, nos ta educa nos yiunan bon si nos ta siña nan cada biaha di ‘no preocupa, cerca nos e cosnan ey no ta pasa’? Mundo ta mas grandi cu Aruba, y tur cos, bon y malo eyfor por pasa cerca nos tambe, y ta anto nos asunto tambe. Si ta necesario pa tuma un actitud corecto awe, ta necesario pa reconoce cu sclavitud a mancha nos pasado tambe, pero mes o mas importante ta pa honra e reconocimento ey cu un actitud di cero intolerancia contra e formanan actual di abuso den traficacion humano. Nos no por cambia pasado, futuro si.