(NLTimes)—Schiphol a sufri di un perdida grandi aña pasa pa via di e problemanan na e aeropuerto. E restriccionnan cu a wordo implementa pa motibo di un deficit den personal a costa e organisacion Schiphol Group casi 120 miyon euro, resultando den un perdida di 77 miyon euro. E cantidad di biaheronan a dobel, pero esaki lo por tabata mas sin e restriccionnan.
Pa motibo di e deficit den trahadonan di seguridad, Schiphol a puntra tur aerolinea pa reduci nan cantidad di pasahero partiendo durante e temporada druk di zomer. Schiphol a mustra di ta incapaz pa maneha gruponan grandi despues di e pandemia y e regreso di demanda pa biaha. Schiphol mester a compensa companianan y biaheronan pa vuelonan cu a wordo cancela of perdi pa via di e rijnan largo na e aeropuerto.
E aeropuerto a nota un ganashi cu un aumento di 83% compara cu e aña prome; un tiki bou di 1.5 biyon euro. Na 2021, e sector di aviacion a mustra e prome recuperacion den e crisis di corona virus. Despues, e aeropuerto a experencia un perdida di 287 miyon euro den operacionnan normal, pero pa via di algun sorpresa den entrada, e ganashi a keda na 104 miyon euro. Na 2022, Schiphol a perde 28 miyon euro den operacionnan normal.
2022 tabata un “mal aña,” segun Schiphol. “E dedicacion y trabou duro di tur hende na Schiphol no a resulta den mehoracionnan necesario den sistema,” Ruud Sondag a declara, ken a tuma e posicion di CEO interim na november despues cu Dick Benschop a renuncia. “A resulta cu nos no por ofrece e servicio cu nos kier. 2022 lo bay den bukinan di historia como un capitulo malo. Un capitulo cu nos no lo lubida pero lo uza pa mehora di awo pa dilanti. Na 2022 nos a cuminsa implementa mehoracion structural. Pasobra nos tin cu ta miho cu esaki y mi tin confiansa cu nos por.”
Schiphol ainda no ta sigur con e recuperacion lo sigui e aña aki. “Esey ta depende riba e desaroyo di Covid, tur restriccion di operacion necesario y e anuncio di gobierno Hulandes pa reduci e cantidad di vuelo na Amsterdam Airport Schiphol pa 440.000 cuminsando for di november 2024,” e aeropuerto a bisa.
Schiphol kier limita e cantidad di pasahero partiendo atrobe te cu juni. E aeropuerto tin poco maletero pa por maneha e gruponan grandi di pasahero, e aeropuerto a menciona. Pero voceronan a conta De Telegraaf cu tin deficit den personal tur caminda, incluyendo seguridad.
Segun De Telegraaf, un otro motibo pakico Schiphol kier implementa un limite den pasahero ta pasobra cu nan ta dunando preferencia na pasaheronan di transfer. E aeropuerto no ta inclui pasaheronan di transfer den e cantidad di pasahero cu nan ta haya, pero nan maleta si tin cu move di un avion pa e otro. Esey kiermen cu e limite riba dianan di fiesta lo por bira mas halto cu e 5% cu Schiphol ta preparando p’e. “Voceronan den e mundo di aviacion” a conta De Telegraaf cu e aeropuerto por hasta kita 10% di nan pasahero partiendo.
