(AP) – Scarlett Johansson ta demandando Walt Disney Co. pa motibo cu nan a lansa e pelicula “Black Widow” ariba di nan servicio di Disney+, cual segun Johansson ta bay den corta di nan contract, y ta haci su persona perde ganashi.

Den un demanda haci riba diahuebs mainta na Los Angeles Superior Count, e actris di “Black Widow” y su productor ehecutivo a bisa cu su contract tabata garantisa un lansamento exclusivamente na teatro so, es decir, solamente na cinema, The Wall Street Journal a reporta.

Johansson su ganashinan potencial tabata mara na e cantidad di benta di ticket na cinema, cual e compania a lansa na mesun tempo tanto den teatro como riba e servicio di peliculanan online yama Disney+, cual ta traha na un manera similar cu Netflix, pagando e tarifa di 30 dollar pa luna.

“Den e lunanan preparando pa e demanda aki, Scarlett Johansson a duna Disney y Marvel tur oportunidad di coregi nan erornan y actua acorde na e contract,” a skirbi den e demanda. “Disney intencionalmente a induci Marvel su kibramento di e contract aki sin algun hustificacion, cu e meta di prevene Johansson di realisa su beneficio completo cu su trato cu Marvel.”

Disney no a duna comentario inmediato na momento di a pidi pa comentario.

Despues cu e lansamento di e pelicula a ser posponi pa mas di un aña debi na COVID-19, “Black Widow” a haci su gran debut generando un ganashi di 80 miyon dollar den Norte America y 78 miyon di teatronan internacional 3 siman pasa, sinembargo, e ganashinan genera di cinema a cuminsa baha significantemente despues di esaki. Durante e di dos weekend den e lansamento, e National Association of Theater Owners a publica un declaracion poco comun, unda cu nan tabata criticando e strategia di lansamento na teatro y online na mesun tempo, argumentando cu esaki ta presta solamente na perdida di ganashi y ta duna mas oportunidad na e peliculanan pirata pero aworaki nan lo ta di mihor calidad, causando cu e necesidad di bay cinema lo baha.

Loke antes tabata mira como taboo, aworaki a bira hopi normal. Actualmente, a bira normal pa lansa peliculanan den teatro y online na mesun momento pa hopi di e studionan grandi durante di e pandemia, cada uno adoptando nan mesun strategia pa por haci esaki. Disney ta empleando e mesun strategia aki cu “Jungle Cruise” y siguiente siman cu Warner Bros. su gran pelicula “The Suicide Squad” cual lo lansa den teatro y riba HBO Max na mesun momento.

E strategia aki durante e ultimo 16 lunanan aki ocasionalmente a causa algun conflicto publico, no solamente di dononan di teatro, sino tambe di trahadonan di pelicula y e personanan cu ta financia e peliculanan, kendenan no ta contento cu e ganashi potencial perdi y e hecho cu e decisionnan aki usualmente no ta involucra tur e personanan inclui.

The Wall Street Journal a bisa cu Warner Media, por ehempel, a paga mas di 200 miyon dollarr den “acuerdonan di compensacion” cu cierto talentonan tocante su decision di lansa tur e peliculanan planea pa aña 2021 na mesun tempo den teatro cu HBO Max.

Pero ningun tabata mesun publico cu Scarlett Johansson su demanda. E actris, ken ta parti di 9 pelicula di Marvel, cuminsando desde aña 2010 su pelicula “Iron Man 2”, rapidamente a bira un topico di hopi comentario riba e red social Twitter despues cu e noticia di e demanda a ser publica.