Walter Gutiérrez, defensor di pueblo di Peru a considera un engaño cu tin empresa di producto lacteo na Peru, cu  ta bende un mescla cu ta parce lechi, y a pidi autoridadnan pa sanciona e practica aki,  cu ta viola e norma legal. “E informacion cu ta riba etiketa ta gaña consumidor. E empresa ta viola dos regla: mester tin informacion; y ta daña e expectativa di nan clientenan,” Gutierrez a splica.

Asociacion peruano di consumidor y usuario (Aspec) a denuncia cu dos empresa di  lacteo ta bende na Peru un  producto mescla,  cu ta parce leche evapora, pero no ta lechi.

E organismo a pronuncia su mes despues cu autoridad di Panama a comunica cu no lo acepta e entrada di e producto den su mercado,  di marca manera “Pura Vida” cu ta produci pa un grupo di empresa di Peru conoci como Gloria. E decision por cambia na momento cu nan cuminsa cu kita e etiketa cu ta bisa cu ta un lechi evapora, y asina bisa cu ta un mescla di lechi di baca, cu soya y otro ingrediente.

Gutierrez a señala cu e organismo cu ta supervisor di Peru mester duna sancion corespondiente  na e empresanan, y a pidi pa autoridadnan cu nan mester mustra nan compromiso cu consumidor. “Ta hopi importante cu Indecopi  por mustra cu tin un compromiso cu e proteccion di consumidor como tambe un interpretacion corecto di codigo di proteccion pa e consumidor”.

Grupo Gloria a acepta cu e producto cu nan ta bende na Panama no ta lechi evapora y a sigura cu lo cambia e contenido di su etiketa pa asina cumpli cu e norma cu ta aplica na e pais Centroamericano, aunke nan a bisa cu no lo cambia esaki na Peru, pasobra  supuestamente e ta cumpli cu tur rekisito cu ta solicita pa autoridadnan di Peru.

Aspec a bisa cu no ta berdad y a comunica cu a traha un revision di cinco marca di lechi mas bendi na mercado local como lechi evapora,  pa asina comproba si e informacion cu ta riba etiketanan ta berdad.

Producto “Pura Vida y Reina del Campo”, cu ta pertenece na empresa Gloria y Nestle no ta cumpli cu e legislacion nacional, pesey no por bende na Peru mas bao denominacion di “lechi evapora”.

“Na productonan cu a ser analisa ta cla cu igual cu na Panama, e etiketa na Peru no tin informacion di naturaleza di e producto,” Aspec a comunica despues cu a informa cu den e proximo dianan lo duna di conoce na  opinion publico e accion cu lo tuma pa cu e situacion grave aki.” Nan a denuncia tambe cu compañianan ta viola e principio di berdad den publicidad,”  ora cu nan ta pone potret di baca riba etiketa, y asina purba di convence e publico cu ta cumpra lechi so, mientras cu e berdad ta,  cu e producto ta un mix cu producto vegetal.

Indecopi a informa cu nan ta analisa e caso aki, den un reunion cu organismo encarga cu supervision di cuminda. Asociacion di ganadero di lechi a convoca un rueda di prensa pa asina duna nan opinion riba e topico aki.