E organisado y promotor cultural, Mirto Laclé, kier comparti cu comunidad e contribucion musical y cultural, origina na Cuba, desaroya pa Portoriqueñonan y otro Latinonan residencia na New York, y exporta pa mundo henter. Esaki ta un di e motibonan cu a inspira sr. Mirto Lacle pa duna bida na su proyecto Sason Cubano cu e aña aki lo tuma luga diadomingo 22 di mei awor, fei di 4’or atardi te cu 7’or anochi na Cas di Cultura.
Sr. Laclé a declara na Bon Dia Aruba cu Sason Cubano ta keda Sason Cubano, pero e aña aki a dicidi di bin cu algun sorpresa. Un di e sorpresanan cu nan tin pa Sanson Cubano 2016 ta cu nan tin e banda musical “Robert y su Solo Banda Show” cu ta bay deleita tur publico presente. Robert Jeandor y su Solo Banda Show, lo percura pa publico disfruta di son, guaracha, merengue, bolero y salsa. Dicho banda lo ta e atraccion principal di e programa, cu por ser considera como un homenahe na Salsa di Mundo.
El a bisa cu nan a dicidi di bin cu e famoso banda aki ya cu e aña aki nan ta dedica Sason Cubano como un homenahe na paisnan manera Puerto Rico y Cuba. “Puerto Rico y Cuba son… De un pájaro, dos alas”, el a trece e famoso frase aki.
Origen di Salsa
Na Aruba tambe ya pa hopi tempo Salsa ta un genero musical gusta. Como muestra di gratitud y den cuadro di Dia Internacional di Diversidad Cultural, Dialogo y Integracion. Aruba kier rindi homenahe na paisnan cultivado di salsa manera Puerto Rico, Cuba, Colombia y Panama.
El a bisa cu e ritmo “Son” a cuminsa na Cuba y el a desaroya. Y den combersacion cu Tito Puente di origen Portoriqueño y CeliaCruz de Cuba nan a transcende riba nificacion di “Salsa” como ritmo musical Caribeño. Di un banda Celia a bisa cu Salsa a bin for di Son Cubano pero na caminda Portoriqueñonan residencia na New York a rescate y nan a exporta esey pa mundo. Originalmente Salsa kiermen saus di tomati. Un nomber relevante pa musica y un baile sensual, mucho mas pica cu mayoria di baile Latino Americano. E baile popular aki ta di origen Cubano. Salsa ta conoci den region Caribe, Sur America, Norte America y Europa. Na diferente parti di mundo hende por siña baila Salsa.
E programa di diadomingo, 22 di mei, lo cuminsa 3.30 p.m. na Cas di Cultura cu pelicula di Salsa’Puerto Rico y Cubason…De un pájaro, dos alas’ riba pantaya grandi. Fuera di e banda ‘Roberty su Solo Banda Show tambe e banda musical ‘Caribbean Combo’dirigi pa Carlos Bislip y hobennan musico lo deleita publico cu musica clasico Cubano y Caribeño. Tambe lo ta presente e cantante Cubano Placido Garcia. Lo tin presentacionnan di baile pa scolnan di baile manera ‘Scol di baile Pachanga’ bou di liderazgo di Oslin Boekhoudt y Janice Boekhoudt, ‘Club di Movimiento’ bou di guia di Samantha Westera y Vivian Maduro-Crespo. Carchi ta obtenibel na Cas di Cultura y cerca sr. MirtoLaclé.
