Un situacion cu ta bira un problema pa nos sector hotelero tin di haber cu e presencia di sargassum, yerba of alga di lama den nos beachnan.
Daniel Aguire, kende ta miembro di e comision di medio ambiente di AHATA, a declara na Bon Dia Aruba cu nan por a obtene informacion valioso for di prome fuente riba con e sector hotelero ta confronta e problema di sargassum. E tabata un di e representantenan di e organisacion no gubernamental cu a atende e conferencia di e sub comision intergubernamental oceanografico di Caribe (IOCARIBE), cu a tuma luga recientemente na Aruba.
Actualmente, Bonaire ta lidiando cu e problema di yerba di lama. Pero no mester bay asina leu, ya cu durante nan training pa monitor sargassum, nan a haya un gran cantidad na Arashi mes. E cantidad no tabata uno alarmante, pero si nan por a monitor y identifica cu cantidad di sargassum cu ta drif for di Bonaire bin Aruba.
Un aspecto cu a hala atencion di e 45 expertonan cu a participa den e conferencia di IOCARIBE, como comunidad cientifico ta purbando di ataca e problema di sargassum for di rais y kico ta pasando y for di unda e ta bin. El a expresa su satisfaccion cu nan por haya experto di Francia cu ta yuda nos den e area aki, pa atende cu e fenomeno di sargassum, cu nos ta experenciando un crecemento grandi. Tambe experto di Brasil, cu ta confrontando e problema aki.
Tambe nan a haya presentacion y training pa monitor sargassum den Caribe. “Nos a haya acceso na cierto website special cu nos por premira cu e sargassum ta biniendo,” el a declara. Durante e seccion aki nan por a ripara cu otro destino turistico den nos region ta bin hayando cantidad di yerba di lama.
“Tur esaki ta permiti nos di por ta alerta y cu nos por prepara pa actua debidamente y asina nos por haci algo…” E ta considera cu un conferencia asina tin un gran balor pa nos comunidad local, pa tin acceso na informacion confiabel y actualisa. Aunke nos ta bayendo riba bon caminda, e ta lamenta cu pais di Centro America cu costa den lama Caribe ta pone mas atencion riba investigacion cu tin di haber cu agricultura, y no den lama. E ta haya cu nos hobennan studiante por enfoca mas riba e tipo di carera cu tin di haber cu lama, ya cu ‘nos ta biba for di dje.’
Pero durante e ultimo dos añanan, nan ta bin hayando cantidad di sargassum, y e no ta un excepcion pa Aruba tampoco. Un caso tin di haber cu e costa di Quintana Roo na Mexico, cu a haya 80km di yerba di lama pa 3 meter halto. “Bo por imagina con dificil esaki por ta! Nan mester deal cu miyones di ton di e sargassum y e ta bira tambe un problema di sanidad publico,” el a bisa. Nan ta buscando e manera di converti e cantidad di yerba di lama den algo positivo ya sea traha un tipo di oil of fertilisante pasobra e ta un materia organico.
Manera e potretnan adhunto ta ilustra, Departamento di Obranan Publico (DOW) a realisa, entre 9 y 17 di mei ultimo, limpieza di sargassum cu a yega na costa di Aruba; specificamente panort di Arashi.
