Sarampi tin un efecto secundario sigiloso: investigacion nobo ta mustra cu e ta elimina un parti grandi di e memoria di sistema immuun riba con pa combati otro malesanan, pues muchanan ta recupera unicamente pa keda mas vulnerabel pa malesanan manera griep of strep.
Cientificonan a yama e hallazgo ‘amnesia immuun’. E curpa por reconstrui e defensa aki – pero por dura añanan.
Cu sarampi den aumento, ‘e ta un fenomeno cu ta duna miedo’, segun Dr. Michael Mina di scol di salud publico di Harvard, autor lider di e investigacion publica ayera den e journal Science.
“Esaki ta bay bou radar”, pasobra dokter no necesariamente lo conecta e pneumonia di un mucha cu e sarampi cu el a haya un aña pasa, Mina a splica.
E team di Harvard a analisa muestra di sanger di 77 mucha prome y despues di sarampi den un comunidad sin vacuna na Hulanda. Nan a busca anticurpa, cual ta recorda virus y bacteria cu a encontra pa guardia contra ripiticion di e infeccion. Despues di recupera di sarampi, e muchanan a keda cu cantidad di anticurpa pa e virus aki – pero esunnan cu nan tabatin anteriormente contra otro malesanan a disminui enormemente.
Den e casonan mas severo, ‘nan tabata mesun vulnerabel cu si nan tabata recien naci’, segun autor senior di e estudio, Stephen Elledge, geneticista di Harvard.
Un estudio separa, publica ayera den Science Immunology, ta confirma e hallazgo. Investigadonan di Wellcome Sanger Institute na Reino Uni a uza e muestranan di sanger Hulandes pa test celnan cu ta produci anticurpa geneticamente, y a conclui cu sarampi ta elimina suficiente pa reset e sistema immuun na estado di infancia.
E investigadonan a bisa cu esaki ta un motibo poderoso pa vacuna contra sarampi. “Ta doblemente importante pa vacuna muchanan”, segun Dr. Mark Mulligan di NYU Langone Health, kende no a participa den e investigacion. “E ta un vacuna cu ta proteha contra supresion imuun.”
E muchanan den e estudio Hulandes a cuminsa sano: tecnologia desaroya den laboratorio di Elledge a haya anticurpa den nan sanger contra malesanan tipico di infancia. Pero dos luna despues di recupera di sarampi, e muchanan a perde un averahe di 20 porciento di nan mix usual di anticurpa. Algun di nan a perde hasta 70 porciento di proteccion contra malesa specifico, limitando nan habilidad di responde si nan encontra e malesa aki di nobo.
Importante ta cu e investigadonan no a haya perdida di anticurpa den poblacion di ‘control’ cu no a ser infecta cu sarampi – ni den mucha despues cu a ricibi e vacuna di sarampi.
