Wilmer Salazar di Departamento di Salud Publico (DESPA) a laga sa e siman aki cu World Health Organization (WHO) y Pan American Health Organization (PAHO) a declara nos region liber di e virus sarampi (na Ingles: measles).
El a bisa cu esaki ta e resultado di campañanan di vacunacion masal den e region di Americas y Caribe.
Sarampi ta afecta primordialmente muchanan bao di cinco aña di edad y por bin cu complicacionnan cu por resulta den morto. Por preveni e virus aki y e declaracion haci pa WHO/PAHO ta un logro grandi pa e departamentonan di salud regional.
E importancia di bon campaña di vacunacion ta refleha den e eradicacion di virusnan. Actualmente tin un total di cinco virus cu e keda eradica den nos region, nan ta: Viruela/Small Pox (1971); Poliomelitis (1994); Rubela y Rubela Congenito (2015); y Sarampi/Measles (2016)
Tanten cu e comunidad ta proteha pa e uzo di vacuna, ta sigui ta alerta y vigilante na no presenta ningun caso mas di e virusnan aki den nos region. No mester tin miedo mas di e enfermedadnan aki, sinembargo mester keda vigilante pa otro areanan si, manera Europa, Asia y Africa pa evita cu un di e virusnan aki ta drenta, y si e drenta ta percura pa contene mesora, un proceso cu ta bay mas facil y efectivo si e poblacion ta protegi.
