Na cuminsamento di añanan 90 e deporte di windsurf tawata hopi popular na Hapon. Finalmente despues di 24 aña E aerolinea Fly ANA ta anfitrion hunto cu Keikyu Corporation y ciudad di Yokosuka di e PWA Fly ANACopa Mundial di Windsurf na Tsukuihama beach. Desde 11 te cu 16 di mei e competencia di PWA na ASIA ta continua na Hapon despues di e evento na Sur- Korea.
Instrumental pa e deporte di bela ta biento y atrobe biento mescos cu siman pasa na Sur Korea ta hopi impredicibel cu ta trece hopi momento di wardamento. Asina cu e biento a lanta ariba dia 13 di mei diferente cualificacion a tuma luga. Sarah-Quita ta core dos manga pa cualifica y ta pasa pa e final di ganadonan di e prome eliminacion. Decisivo ta e salida. Mester evita di ta den posicion delanta y na mes momento evita di drumi den luz pa otro regatista no tap’e, kitando e biento. Sarah-Quita tin su holoshi sincronisa ariba e seconde. Manera un flecha e ta sali tira bay pa yega e boei como prome.
Desde principio te fin e ta na cabes di e careda y di nobo mescos cu el a haci na Sur-Korea e ta cementa su dominio ganando e prome eliminacion. E comentario ta cu e regatista di 25 aña di Aruba ta cuminsa su temporada di competencia bon y ta defende su titulo di campeon mundial di slalom 2016 na perfeccion. E di dos eliminacion ta pendiente pa core ya cu 8 regatista femenino a clasifica pa e careda final di ganadonan. Ya tin dos dia caba cu no por core e careda aki pa via di e biento debil cu ta supla. Na Hapon e biaha aki si a logra haya resultado den e categoria masculino. E atleta Frances di Saint Maarten Julien Quentel ta gana e prome eliminacion. Finalmente Sarah-Quita a sa di capitalisa ariba e unico oportunidad cu a presenta y trece Victoria pa Aruba. Hunto cu Julien Quentel di SXM, Caribe a briya na lehano Oriente.
