E ta un di e personanan mas influyente y destaca den comunidad. Su pasion pa deporte y lama a haci’e ganado di 19 titulo mundial den diferente disciplina, unda e ultimo tabata di ‘Ola’ unda esey pa su persona tabata esun di mas satisfactorio segun el a conta. Su nomber ta Sarah-Quita Najive Offringa, “Cabeibusha”.

Den un entrevista special cu reportero di Bon Dia Aruba, Offringa a expresa cu el a hinca hopi esfuerso den su ultimo titulo, unda cu e dia cu el a logra esey el a sinti hopi contento.

Na 2019 el a gana su di 17 titulo, prome biaha den ola, y despues di un aña sin competencia door di pandemia Covid-19, na aña 2021 el a gana dos titulo mas den categoria freestyle y slalom.

Naci un 4 di juli di aña 1991 na Aruba, for di 2003 e ta competi den campeonatonan di windsurf PWA World Tour ganando titulonan den diferente categoria como slalom, ola y freestyle. Na 2010-2011 el a logra e titulo di PWA “Women’s Freestyle World Championship” unda el a keda nomina pa International Sailing Federation.

Su bela tin e number ARU-91 y te hasta e tin un documental titula “Cabeibusha, the Curly Gem” cu a wordo estrena dia 2 di october di aña 2015 como parti di e “Windsurf World Cup Sylt” na Alemania. E pelicula ta di Julian Robinet y ta e prome pelicula cu ta trata di hende muhe den deporte di windsurf.

Den un serie di preguntanan, el contesta cu loke ta falta pa haci ta cu semper den su deporte ora el a gana e titulonan di aña pasa compara cu cinco aña atras, “tin un diferencia grandi den nivel cu mi tin. Mi kier mehora semper y mi kier wak mas hende muhe den deporte aki. Mi kier mustra cu hende muhe tambe por”, el a bisa.

Por a mira cu door di pandemia Covid-19 el a haya mas tempo pa keda na Aruba, na unda el a comenta cu el a organisa dos campamento pa mucha unda el a sigura cu e ta gusta traha cu nan. E dianan di campamento e hunto cu su colaboradornan a enfoca riba deporte di lama, unda nan a haci windsurf, beach volleyball y tambe nan a haci un beach clean up pa asina nan tambe pensa riba medio ambiente.

“Esey tabata hopi leuk, mi ta spera ora mi tin mas tempo mi por sigui haci esey”, Offringa a expresa.

Den un par di dia e tin cu bay biaha, caminda e tin cu cumpli cu compromisonan di nan sponsor, como un photoshoot, manera el a sigura. Y na mita di maart e ta bin back te cu fin di april. “Akinan mi ta djis train y pa fin di april mi ta cuminsa sali atrobe pa competi”.

Ademas di e clima, e diferencia di competi na Aruba cu na otro paisnan ta e disciplina cu cual e ta train, segun el a declara. E ta e unico persona na Aruba cu ta haci tur disciplina, excepto cu pa train olanan e tin cu sali y biaha. “Temporada aki tin hopi biento na Aruba y esey ta bon, pero fin di april mi tin cu bay y busca ola algun caminda”.

Tocante algun incidente cu el a yega di haya na lama, el a conta cu nada erg a yega di pasa cune na Aruba. Un experiencia cu el a trece dilanti ta ora e tabata cu algun amigo den edad hopi hoben, nan a dicidi di haci windsurf for di Fisherman’s Hut te Manchebo pa topa cu un par di amigo. Pero net fin di dia e biento a bira, y ora di bin back nan no por a drenta na Fisherman’s’ Hut sino cu nan a sali hopi leu banda di botonan di tanker. “E dia ey si mi a pidi Papa Dios pa nos yega bon”.

Tempo cu e tabata chikito el a haci hopi deporte na unda su mayornan a dicidi pa su ruman y e purba kico nan tabata gusta di haci. El a haci tennis, landamento y windsurf pa hopi aña largo, pero na final el a keda cu windsurf cu a bira su trabao y su pasion.

Pa finalisa, Offringa a duna un mensahe na esnan cu ta duna apoyo na su persona, ya cu e ta sinti e calor di hendenan di Aruba ora e ta riba su isla. “Mi kier mustra cu bo por yega asina leu tanten bo ta hinca bo energia na dje y semper ta importante pa rondona bo mes cu hende cu tambe kier wak bo yega leu y logra bo metanan”.