Presidente di Colombia, Juan Manuel Santos, a declara riba revelacion di Roberto Prieto, ken tabata gerente di su campaña presidencial na 2010. Prieto a informa cu algun placa for di Odebrecht a ser usa di manera iregular.
Segun Prieto, Odebrecht a paga tur poster cu nan a usa pa campaña di Santos na aña 2010. Prieto ta bao investigacion pa envolvimento den un trama di soborno di e empresa di Brasil. “Mi ta acepta cu mi a ordena e posternan, pero e placa a bay pa otro persona; ami a simplementa ehecuta. Nan a bisami cu e placa a bin di Odebrecht. Mi a manda e factura. Mi ta acepta mi culpa, pero mi no tabata e unico, otro hende a haya e placa,” Prieto a bisa.
Santos a bisa den un video cu a ser publica diamars riba su cuenta na Twitter cu e no sa nada di e negoshi ey, den cual a viola directamente tur norma di etica y control cu e mes a exigi pa imponenan den campaña.” E presidente a rechasa y condena e accion aki y a solicita pa tur hende cu ta envolvi den e caso aki, pa nan aclara rapidamente e situacion aki cu ta inaceptabel.” Santos a solicita tambe pa autoridadnan encarga cuminsa cu investigacion di su administracion y asina impone sancion riba tur hende responsabel di cualkier acto di corupcion.”
“Mi ta lamenta y mi ta pidi disculpa na tur Colombiano pa e situacion hopi bergonsoso aki cu nunca mester a tuma lugar y di cual mi a bin haya sa awor,” Santos a bisa. Declaracion di Santo ta concorda cu declaracion di Prieto diamars mainta, caminda el a splica cu: “ta un situacion iregular y e grupo di campaña lo acepta, pero Juan Manuel Santos no tin ningun relacion cu e asunto ey. E comite mester acepta cu nos a laga Santos mustra malo. Nos tin cu saca un comunicado, caminda ta acepta cu e operacion tabata iregular y cu Juan Manuel Santos no tabata sa nada.”
