Hopi biaha, nos ta celebra e temporada di Pasco sin cu nos sa su berdadero nificacion. Ta e temporada mas emocionante y bunita di aña, ora tur personanan ta reuni, ta mustra amor pa nan famia, ta reflexiona, comparti y asina tambe e muchanan ta yena di goso cu e yegada di regalonan di parti di Santa Claus.

Durante un entrevista special cu Bon Dia Aruba a haci cu Carolina Span, Vice Presidente y secretario di Santa’s Causes Aruba, el a splica cu esaki ta un proyecto caritativo cu e deseo di haci un regalo di Pasco pa minimo 100 mucha di menos recurso, entre edadnan di 0 pa 12 aña. Banda di esey nan lo kier regala pa nan famia un macutu cu productonan comestibel y no-comestibel, cu lo yuda haci nan Pasco mas agradabel.

Span a comenta cu e idea di duna regalo pa muchanan a cuminsa di parti di Camille Arends, e presidente di e proyecto. E tabatin e idea desde varios aña pasa, su tata tabata reparti macutu rond di su trabou y semper Camille a haya di esaki un gesto hopi bunita, specialmente con e famianan tabata reacciona. Camille a bay cerca Carolina cu e idea, pasobra e tin hopi amor tambe y e experencia necesario den organisacionnan caritativo. Despues di haya Carolina ‘on board’, Camille a cera un grupo di famia y amistadnan cu ta comparti e mesun amor y pasion pa e proyecto aki.

Di mesun manera, el a haya importante e parti di balornan cu cada persona tin pa e proyecto, integridad di e miembronan di e team y partners, bon comunicacion entre e miembronan di team, partners y esunnan cu ta haci donacion, trabou di ekipo pa logra nan metanan, responsabilidad y credibilidad di nan accionnan y decisionnan, un sentimento di comunidad cu ta esencial pa ta consciente y tin responsabilidad social, husto den e seleccion di beneficiarionan y den e proceso di distribui tur fondo di manera igual, optimismo den nan habilidad pa logra nan meta, confiansa den cada miembro di e team y partners, eficiencia den e manera cu nan ta aloca nan tempo y recurso pa na final nan por pasa dushi den e proceso.

Manera tur proyecto, tin un ekipo pa por yega te nan metanan. Span a duna di conoce e ekipo di Santa’s Causes Aruba cu ta conforma pa e Presidente Camille C. Arends, Vice Presidente y Secretaria Carolina J. A. Span, assistent di secretaria Asaria Croes y Daniella Pop, Tesorero y logistica Jason Geerman, assistent di e tesorero y logistica Andrew Martinez, coordinador di regalonan Mijaila R. Roos, coordinador di macutu Stephany M. Geerman-Maduro, miembro di proyecto Emile Thiel y ekipo di PR cu ta Camila Willems, Dana Wong, Alysha Boekhoudt y Julisa Arends-Hoevertsz.

Di mesun manera, Span a bisa cu nan mester di donacion y fondonan pa por logra e obhetivo. El a señala cu nan ta haya fondo door di pochi di donacion cu personanan por haya cerca un di nan partners, manera Jona’s Best Snacks, Lindy’s Lifestyle Boutique y Arashi BeachShack. Tambe nan tin un cuenta na GoFundMe na unda hende por paga cu un credit card, localidad di e ‘donation boxes’ y e cuenta di GoFundMe lo wordo anuncia dia 1 di november di 2019.

Manera tur aña, nan ta haci cu e fondonan cu ta pa cumpra e regalo pa Pasco y haci e macutunan, tambe e personanan por cumpra un of mas regalo pa un mucha cu nan lo kier haci feliz den Pasco. Pa e macutu tambe hende por cumpra un of mas producto for di nan lista di producto y entrega esey den un di nan ‘Drop-off locations’ cu lo wordo anuncia na november tambe.

Un deseo pa e aña aki, ta cu nos Pasco lo bira real. No ta trata di paña nobo of regalonan hopi caro, e ta trata di espirito, di duna sin ricibi nada. Ta felicidad pasobra nos ta mira alegria den otro persona, ta e olvido di nos pa haya tempo pa nos sernan keri, laga atras cosnan cu no ta importa mas y enfoca riba e balornan berdadero, cu e personanan por kere den nan soñonan.

Pa finalisa, Span a bisa pa corda semper ta amabel cu otro y corda cu aunke Pasco ta un temporada yen cu felicidad, e por trece hopi presion financiero pa otronan y nos mester ta consciente di esaki pa no laga otro wordo presiona den esaki.