Temporada di Pasco ta yegando rapidamente y esey kiermen cu e elfnan di Santa’s Cause ta cla pa cuminsa traha y asina logra yena di felicidad e mucha- y hobennan di Aruba. Srta. Camille Arends, fundadora y presidente di Santa’s Cause, a conta Bon Dia Aruba un poco mas di e trabou cu Santa’s Cause ta haci y tambe e inspiracion tras di e gran proyecto aki.

Cuater aña pasa Camille a cuminsa cu Santa’s Cause. E ta conta cu pa hopi aña caba e tabatin e deseo di cuminsa cu e bunita proyecto aki pasobra el a lanta den un famia catolico y tur Pasco e y su famia tabata hiba macutu na misa pa yuda esunnan di menos recurso.

E ta conta cu su tata tambe na su trabou tabatin den e comision di parti basket den comunidad y semper e tabata gusta bay cune. “E ta algo cu mi a lanta cune y mi kier a haciele pero mas grandi”, Camille a bisa.

E ta conta cu hopi biaha e no tabata sa unda e mester a bay pa por a yuda den comunidad y ora cu e la cuminsa cu e proyecto Santa’s Cause cuater aña pasa , social media no tabata mesun grandi compara cu aworaki. “Hopi di e fundacionnan no tabatin social media of nan social media no tabata yega cerca mi, dus mi no tabata sa di nan y mi mester a echt busca hopi pa haya unda mi por a bay pa regala mucha regalo of haci algo”, el a splica.

Mi ta sinti cu si nos kier yuda mas hende, e hendenan cu kier yuda mester sa un manera con pa yuda y pesey nos kier uza social media tambe pa asina nos por cuminsa cu algo unda cu hopi hende mas or yuda”, Camille a agrega.

E ta conta cu e idea principal di Santa’s Cause ta pa duna mucha- y hobennan di entre 0 y 18 aña un regalo pa Pasco. For di e momento cu Santa’s Cause a cuminsa, Camille ta splica, el a cera un team di hoben cu a yudele cu e proyecto. Tur aña nan a logra surpasa e meta cu nan pone y cada aña nan ta sigui bay mas halto, y e aña aki nan kier yuda mas cu 250 mucha y hoben,

Pa loke ta trata e proceso di escogencia of di creacion di e lista di muchanan cu ta aplica pa ricibi un regalo di Santa’s Cause, Camille ta splica cu nan mes no ta scoge e muchanan. Santa’s Cause ta traha cu entre otro otro Stichting Reclassering, Sociale Zaken, diferente scolnan y tambe misanan, cu e persona cu sa cua ta e muchanan cu echt mester di e regalo of e basket y nan ta haya un lista for di personan aki.

Nos ta haya solamente e mucha su edad, su sexo y su wishlist, dus kico e ta interesa den dje of kico e ta gusta haci pa asina nos por bisa e padrino of madrina, e personanan cu lo cumpra e regalo, kico e mucha of hoben gusta. Nos tin un budget di entre 35 y 50 florin tambe pa asina e ta eerlijk pa tur mucha y hoben”, el a agrega.

Recientemente, dia 15 di october, Santa’s Cause a bira un stichting oficial, Srta. Camille ta splica cu e motibo pakico nan a bira un stichting ta pasobra cu como un stichtingvtin mas porta ta habri pa ricibi ayudo di diferente instancianan y companianan, y e ta pone preto riba blanco e seriedad y compromiso cu Santa’s Cause tin cu e mucha- y hobennan di e comunidad di Aruba

Camille ta indica tambe cu te cu ainda e punto di enfoke pa Santa’s Cause ta pa brinda ayudo durante temporada di Pasco, pero durante e aña tin famianan cu mester algo extra cu ta contact e stichting pa haya ayudo. “Nos ta traha cu organisacion y stichting cu ta informa nos ora cu un

famia mester di un basket y nos ta zorg pa nan ricibi esaki. Durante e aña nos tin contacto cu hopi famia cu ta keda message nos cu nan mester yudansa y nos ta yuda nan durante e aña tambe cu loke nos por”, el a bisa.

Por ultimo Camille a expresa su mensahe pa henter comunidad, specialmente mirando cu temporada di Pasco ta acercando. “No ta tur hende ta den un bon situacion financiero aworaki, specialmente cu covid, hopi hende a bay atras y hopi hende mester ayudo, y esunnan cu hopi biaha ta sufri mas, principalmente den temporada di Pasco, ta e muchanan. Nos lo aprecia e ayudo di comunidad pa haci e muchanan aki feliz pa medio di bira un padrino of madrina. Tuma Contact cu nos pa yuda un mucha, of mas, of un hoben pa duna nan un regalo”.